ليۆاننىڭ تاۋلى وڭىرىندە ءسۇريانىڭ شەكاراسىن اسىپ، قارلى بوراننان قازا تاپقان 9 سۇريالىق بوسقىننىڭ دەنەسى تابىلدى. ولار ءسۇريا مەن ليۆاننىڭ ەڭ ۇلكەن شەكارالىق بەكەتى  ماسناعا جاقىن اۋماقتاعى تاۋلاردىڭ بىرىندە جۇما كۇنى بولعان بوراننىڭ استىندا قالعان. ليۆان اسكەرى قۇربان بولعان ازاماتتاردان بولەك، تاعى 6 ادامدى تاۋىپ، اۋرۋحاناعا جەتكىزگەنىن حابارلادى. بۇل تۋرالى ءال-جازيرا اقپاراتتىق اگەنتتىگى جازدى. 

ليۆان اسكەري قىزمەتىنىڭ حابارلاۋىنشا، قازا تاپقان ازاماتتاردىڭ تەگى ءالى انىقتالماعان، بىراق ولاردىڭ قاتارىندا كەمى ءبىر بالا بار ەكەنى بەلگىلى بولدى. قازىر ارنايى قۇتقارۋ جاساعى تاۋلى وڭىردەگى وزگە سۇريالىق بوسقىنداردى ىزدەستىرىپ جاتىر. ولاردى ۋاقىتىلى تاۋىپ، مەديتسينالىق كومەك كورسەتۋ تاعى بىرنەشە ازاماتتىڭ ءومىرىن ساقتاپ قالۋعا مۇمكىندىك بەرەدى.

ءال-جازيرا اقپاراتتىق اگەنتتىگى ءتىلشىسىنىڭ حابارلاۋىنشا، قىس مەزگىلى - سۇريالىق بوسقىنداردىڭ تىرشىلىگى قيىندايتىن كەز. سوڭعى كۇندەرى اۋا تەمپەراتۋراسىنىڭ كۇرت تومەندەۋىنە بايلانىستى، ماسنادان سولتۇستىككە قاراي  60 كم جەردەگى جازىقتا ۋاقىتشا شاتىرلاردا تۇرىپ جاتقان 357 مىڭ بوسقىننىڭ جاعدايى اۋىرلاي تۇسكەن. اتالعان اۋماقتا بولعان ءتىلشى بوسقىنداردىڭ شاتىرى سۋىق پەن جاڭبىردان قورعاۋعا قابىلەتسىز پلاستيكالىق جابىندىلاردان جاسالعانىن ايتادى. رەسمي دەرەك بويىنشا، ليۆاندا 1 ملن سۇريالىق بوسقىن تىركەلگەن. ال بەيرەسمي ولاردىڭ سانى 1,5 ميلليونعا جۋىقتايدى. بۇۇ-نىڭ بوسقىندار ءىسى جونىندەگى اگەنتتىك ليۆاندا تۇراقتاعان سۇريالىق ازاماتتارعا كومەك كورسەتۋ ءۇشىن ءتيىستى قاراجاتقا قول جەتكىزە الماي وتىرعانىن جەتكىزدى. اگەنتتىككە وتكەن جىلى سۇرالعان 228 ملن اقش دوللارى كولەمىندەگى قارجىنىڭ تەك 60 پايىزى عانا بەرىلگەن.

“The Qazaq Times”