تۇركيا اسكەرلەرى ءسۇريا شەكاراسىنا اتتاندى

تۇركيا پرەزيدەنتى رەجەپ تايىپ ەردوعان ەسكەرتۋ جاساپ، ءسۇريانىڭ سولتۇستىگىندەگى (تۇركيا-ءسۇريا شەكاراسى ماڭى) كۇردتەر باقىلاۋىنداعى ەكى ايماققا اسكەر كىرگىزەتىنىن ايتتى. قازىر تۇركيا ارمياسىنىڭ تانك قوسىندارى مەن جاياۋ اسكەرلەرى تۇركيانىڭ وڭتۇستىگىنە توپتالۋدا. بۇل تۋرالى «BBC» رەسمي سايتىندا جازدى.

ءسۇريانىڭ سولتۇستىگىندە كۇردتەردىڭ حالىقتىڭ ءوزىن ءوزى قورعاۋ كۇشتەرى (YPG) ايماقتى ءوزىنىڭ باقىلاۋىنا الىپ كەلگەن. ال بۇل قارۋلى قوسىندى تۇركيا ۇكىمەتى تەررورلىق ۇيىم دەپ سانايدى. ەردوعان سوزىندە افرين جانە مانبيج قالالارىنداعى «تەررورلىق ۇيىمدى» تالقانداۋ ءۇشىن سۇرياداعى سەپاراتيستىك قارۋلى كۇشتەرى تۇركيا اسكەرلەرىنە كومەكتەسەتىنىن ايتقان. بۇعان دەيىن تۇركيا قارۋلى كۇشتەرى بولشەكتەۋشى تاراپتىڭ باقىلاۋىنداعى افرين قالاسىنا ارتيللەريالىق شابۋىلدار جاساعان بولاتىن.

ايماقتى باقىلاۋىنا ۇستاپ تۇرعان كۇرد كۇشتەرىنىڭ رەسمي وكىلى باحجات ابدۋ ارتيللەريالىق شابۋىلدى ايىپتاپ، افرين حالقىنىڭ تۇرىك ارمياسىنا قارسى كۇرەسەتىنىن ايتقان. افريننىڭ جەرگىلىكتى باق وكىلدەرى قالادا 500 مىڭعا جۋىق حالىق تۇرادى.

ەردورعان بىرنەشە ايدان بەرى اتالعان قالادا تەررورلىق كۇشتەردى تازالاۋ وپەراتسياسىن جۇرگىزەتىنىن ايتىپ كەلگەن. انكارا بيلىگى YPG مەن ءتۇريادا تىيىم سالىنعان كۇرد جۇمىسشى پارتياسى (PKK) اراسىندا بايلانىس بار دەپ ەسەپتەيدى. بۇل پارتيا تۇركياداعى كۇردتەردىڭ دەربەستىك الۋدى كوزدەيدى، بۇل ءۇشىن 30 جىلدان بەرى كۇرەسىپ كەلگەن. ال، ءسۇريا جەرىندەگى YPG مەن اقش قولداۋىنداعى «ءسۇريا دەموكراتيالىق كۇشتەرىنىڭ» تۇركيا شەكاراسىنا جاقىن ون مىڭداعان شارشى شاقىرىم اۋماقتى باسىپ العانى انكارانى قاتتى الاڭداتتى.

2016 جىلى تۇركيا ۇكىمەتى تۇركيانىڭ سەپاراتيستەرىن قولداپ، «يسلام مەملەكەتى» تەررورلىق ۇيىمىنىڭ ماڭىزدى ايماعى جارابۋلۋس جانە ءال-باب قالالارىن تەررورلىق توپتان ازات ەتكەن. وسىدان كەيىن رەسمي انكارا YPG-دىڭ باتىسقا باعىتتالعان ارەكەتتەرىن توقتاتۋدى كوزدەپ، تۇركيامەن شەكتەسىپ جاتقان ايماقتاردى ءوز باقىلاۋىنا الۋعا تىرىسقان. وتكەن جىلى قازان ايىندا تۇركيا بيلىگى رەسەي جانە يرانمەن كەلىسىپ، يدليب پروۆينتسياسىنا اسكەرلەرىن كىرگىزگەن بولاتىن. وسى ارقىلى ءسۇريانىڭ ۇكىمەت كۇشتەرى مەن بولشەكتەۋشى كۇشتەرى اراسىنداعى قاقتىعىستى توقتاتۋعا بولادى دەگەن.

تۇركيا پرەزيدەنتى ەردوعان ناتو جانە اقش-تى «ءسۇريا دەموكراتيالىق كۇشتەرىن» تۇركيا شەكاراسىنا جاقىن اۋماقتا اسكەري جاتتىعۋلار وتكىزبەۋگە شاقىرعان. سەبەبى، اقش «يم» ۇيىمىنا قارسى كۇرەسۋ ءۇشىن ءسۇريانىڭ تۇركيا جانە يراكقا شەكارالاس جەرىندە 30 مىڭ قۇرالدى جاساقتى جاتتىقتىرۋ جوسپارىن جاريا ەتكەن. وسى اپتانىڭ باسىندا اتالعان جوسپارعا قارسى انكارا بيلىگى مالىمدەمە جاساپ، «اقش تەررورلىق ارميا» قۇرىپ جاتىر، تۇركيا وعان بەلسەنە قارسى تۇرادى» دەگەن پىكىر بىلدىرگەن. قازىر وڭىردە جاڭا قايشىلىقتار ۇلعايا ءتۇستى.

“The Qazaq Times”