2018 جىلى الماتىنىڭ يندۋستريالدى ايماعىندا (ايا) 12 جاڭا ءوندىرىس ىسكە قوسىلادى. جوبالار ماشينا جاساۋ، قۇرىلىس يندۋسترياسى، فارماتسەۆتيكا، تاماق جانە حيميا ونەركاسىبىنىڭ سالالارىنا جاتادى، دەپ حابارلايدى الماتى قالاسى اكىمدىگىنىڭ ءباسپاسوز قىزمەتى.

وسىلايشا، قالادا سكوتچ، توڭازىتىلعان قامىر، كابەل ونىمدەرىنىڭ، مەديتسينالىق ماقساتتاعى ونىمدەردىڭ، پوليمەرلىك بۇيىمداردىڭ جانە تاعى باسقا ونىمدەردىڭ ءوندىرىسى باستالادى. بۇدان باسقا، ونەركاسىپ ايماعىنىڭ اۋماعىندا كوكونىس ءوسىرۋ بويىنشا جىلىجاي كەشەنىنىڭ، سونداي-اق تابيعي تاستى وڭدەۋ بويىنشا زاۋىتىنىڭ قۇرىلىسى اياقتالادى.

مىسالى، «GROUP NAK 8» جشس توڭازىتىلعان قامىر شىعاراتىن الماتىلىق ءوندىرۋشىسى ءارى قاراي نان، بولكە، كىشكەنتاي بالىشتەر، ماففيندەر، پەچەنە سىندى 60 ءتۇرلى اتاۋىن شىعاراتىن بولادى. زاۋىت تاۋلىگىنە 2 مىڭ كگ توڭازىتىلعان ءونىم وندىرەدى دەپ جوسپارلانىپ وتىر. كاسىپورىننىڭ جارتىلاي دايىن ونىمدەردى قالانىڭ كافەلەرىنە، مەيرامحانالارىنا جانە قوناقۇيلەرىنە تاراتۋ نيەتى بار.

بۇدان باسقا، «المەرەك» جشس فارماتسەۆتيكالىق كومپانياسى شىنى تۇتىكتەر، قالاقشالار، گينەكولوگيالىق اينالار جانە ت.ب. مەديتسينالىق ماقساتتاعى بۇيىمداردى وندىرەتىن بولادى. ايا اۋماعىندا زاۋىتتىڭ قۇرىلىسىن سالۋ كاسىپورىنعا وندىرىستىك الاڭىن 3 ەسەگە كەڭەيتۋگە مۇمكىندىك بەرەدى.

«الماتىنىڭ يندۋستريالدى ايماعى» جشس ديرەكتورى ءادىل بورلىباەۆتىڭ سوزىنشە، يندۋستريالدى ايماقتاعى زاۋىتتىڭ قۇرىلىسىن الماتىلىق كاسىپكەرلەردەن باسقا، شەتەلدىك ينۆەستورلار دا جۇرگىزۋدە.

سپيكەر اتاپ وتكەندەي، رەزيدەنتتەر دايىن ينفراقۇرىلىمىمەن جەر تەلىمىن الۋ مۇمكىندىگىنىڭ ناتيجەسىندە، الماتىنىڭ يندۋستريالدى ايماعىن وتە ءتيىمدى ۇسىنىس دەپ قابىلداپ وتىر. رەزيدەنت جەر تەلىمىن 3 جىلعا دەيىن جالعا الا الادى، ونى جەكەمەنشىككە ساتىپ الا الادى جانە جەر تەلىمىن زاتتاي گرانت رەتىندە، ياعني تەگىن دە الا الادى.

“The Qazaq Times”