فوتو: Amazon

دونالد ترامپ اكىمشىلىگىنىڭ شامىنا تيەتىن دەرەكتەرگە تولى مايكل ۆولفتىڭ "Fire and Fury: Inside the Trump White House" ء(ورت پەن ىزا: ترامپ اق ءۇيىنىڭ ىشىندە) كىتابى ساتىلىمعا سەيسەنبى كۇنى ءتۇسۋى كەرەك بولعان. بىراق بۇل  اق ءۇي قىزمەتكەرلەرىنىڭ ارالاسۋىمەن  جۇماعا دەيىن شەگەرىلدى. ءدال وسىنداي مالىمدەمە جاساعان كىتاپ اۆتورىنىڭ سوزىنشە، ول دونالد ترامپ قورعاۋشىلارىنىڭ تاراپىنان ۇلكەن قارسىلىققا ۇشىراعان. ولار كىتاپتا جالعان اقپارات كوپ ەكەنىن جانە كوپ پىكىرلەردىڭ شىنايىلىعى كۇمان تۋدىراتىنىن  ايتادى. 

مايكل ۆولف ءوزىنىڭ تۆيتتەر پاراقشاسىندا: "ەرتەڭنەن باستاپ، كىتاپتاردى ساتىپ الۋعا بولادى. راقمەت سىزگە، پرەزيدەنت مىرزا!", - دەپ جازدى. ەكى جۇزگە جۋىق سۇحبات قامتىلعان كىتاپ دونالد ترامپتىڭ پرەزيدەنت بولىپ سايلانعان ساتىنەن بۇگىنگى ۋاقىتقا دەيىنگى مەملەكەت باسشىسى مەن ونىڭ جاقىندارىنىڭ ءارتۇرلى ارەكەتتەرى مەن ايتقان سوزدەرىن "اشكەرەلەيدى". تومەندە كىتاپقا ەنگەن، بىردەن قىزۋ پىكىرتالاس تۋدىرعان بىرنەشە تۇجىرىمدى نازارلارىڭىزعا ۇسىنامىز:

  • دونالد ترامپتىڭ ءوزى دە، ونىڭ توبى دا پرەزيدەنت سايلاۋىندا جەڭىسكە جەتكەنىنە تاڭ قالعان. كىتاپتا جاڭادان سايلانعان مەملەكەت باسشىسىنىڭ تاڭدانعان قالپىنداعى فوتوسۋرەتى قوسا بەرىلگەن.
  • يۆانكا ترامپ پەن كۇيەۋ بالاسى جارەد كۋشنەردىڭ بىرلەسكەن جوسپارى بويىنشا، دونالد ترامپتىڭ قىزى امەريكانىڭ ءبىرىنشى ايەل پرەزيدەنتى بولۋى ءتيىس.
  • دونالد ترامپقا ءوزىنىڭ يناۋگۋراتسياسى ۇناماعان.
  • امەريكاداعى مەديا ماگنات رۋبەرت مەردوك دونالد ترامپتى "اقىماق" دەپ اتاعان، ال قازىرگى پرەزيدەنت ونى ەرەكشە قۇرمەتتەپ، ۇلى ادام سانايدى.
  • اق ءۇيدىڭ بۇرىنعى قىزمەتكەرى سيتۆ بەننون دونالد ترامپتىڭ ۇلىنىڭ رەسەي وكىلدەرىمەن كەزدەسۋىن "ساتقىندىق" دەپ باعالاعان.
  • دونالد ترامپتىڭ باس كەڭەسشىسى جارەد كۋشنەر پرەزيدەنت ساياساتىنداعى ەڭ نەگىزگى ءۇش باسىم باعىتتى كورسەتۋ تۋرالى ساۋالعا جاۋاپ بەرە الماعان.

ۆۆس-ءدىڭ سولتۇستىك امەريكاداعى ءتىلشىسى دجون سوپەل مايكل ۆولفتىڭ كىتابىنا "ەگەر بۇل كىتاپتا ايتىلعانداردىڭ تىم بولماسا جارتىسى شىندىق بولسا، وندا شىعارما اقىلىنان اداسقان پرەزيدەنت پەن بەيبەرەكەتسىزدىك ورناعان اق ءۇي تۋرالى" دەگەن باعا بەردى.

Washington Post باسىلىمىندا جارىق كورگەن رەسمي مالىمدەمەدە دونالد ترامپتىڭ قورعاۋشىلارى كىتاپ اۆتورىنان شىعارمانىڭ تارالىمىن دەرەۋ توقتاتۋعا شاقىرادى. ەسكەرتۋ ورىندالماعان جاعدايدا، پرەزيدەنتتىڭ قورعاۋشىلارى كىتاپتا جالعان تۇجىرىمدار مەن دالەلدەنبەگەن ايىپتاۋلار كوپ ەكەنىن ەسكەرىپ، اۆتورعا قارسى "جالا جابۋ، جالعان قارالاۋ" باعىتى بويىنشا ءىس قوزعاۋعا شاعىم تۇسىرە الادى.

“The Qazaq Times”