سولتۇستىك كورەيا وڭتۇستىك كورەياعا جىلى قاباق تانىتتى

سوڭعى كەزدە وڭتۇستىك جانە سولتۇستىك كورەيا اراسىنداعى شيەلەنىستەر قايتا وڭالا باستاعان سىڭاي تانىتتى. سولتۇستىك كورەيا سارسەنبى كۇنى ەكى ەل اراسىنداعى تىكەلەي جالعاناتىن بايلانىس قوڭىراۋىن قايتا ىسكە قوسىپ، وسى باستامالارى ارقىلى كەلەر ايدا پيوڭياڭدا (پحەنيان/Pyongyang) بولاتىن قىسقى وليمپيادا جايلى اقىلداسۋعا جول اشتى. بۇل تۋرالى «WSJ» باسىلىمىنىڭ رەسمي سايتى حابارلادى.

سولتۇستىك كورەيانىڭ رەسمي اقپارات كوزدەرى ەكى ەل ۇكىمەتتەرىنىڭ ءوزارا قوڭىراۋ شالعاندارىن حابارلاسا،  بۇل حاباردى «كورەي بىرلەستىگى» ۇيىمى دا راستادى. وسىدان ءبىر كۇن بۇرىن، وڭتۇستىك كورەيا جاق كحدر ۇكىمەتىنىڭ رەسمي تۇلعالارىمەن كەزدەسۋگە ۇسىنىس جاسادى. ەكى كۇن بۇرىن سولتۇستىك كورەيانىڭ ەڭ جوعارعى باسشىسى كيم جوڭ ۋن (كيمچەن ىن/Kin Jong Un) سولتۇستىك كورەيادان قىسقى وليمپياداعا قاتىسۋشى سپورتشىلارعا قولداۋ كورسەتەتىنىن ءبىلدىردى.

كحدر ۇكىمەتى وڭتۇستىك كورەيانىڭ ساياسي باسقارماسىنىڭ جەتەكشىسى ري سوڭ گۋونعا (Ri Son Gwon) جولداعان مالىمەتىندە تىكەلەي قوڭىراۋلاردى ىسكە قوسۋ ۇسىنىسىن قابىلداعانىن جانە قىسقى وليمپيادا ويىندارى تۋرالى اقىلداسۋلاردىڭ باستالىپ كەتكەنىن ايتقان.

«كورەي بىرلەستىگى» ۇيىمىنىڭ حابارىنا قاراعاندا، ەكى ەلدىڭ رەسمي تۇلعالارى ورتاق باقىلاۋىنداعى شەكارا بەكەتى پان ءمۇن جوندا (Panmunjon) قوڭىراۋ ارقىلى سويلەسكەن. سەۋل تارابىنىڭ رەسمي مالىمەتىندە «بۇل جولعى ەكى جاقتىڭ كەلىسىمگە كەلۋىنىڭ ماڭىزى زور» دەپ باعالانعان. ءارى بۇدان كەيىنگى ەكى ەل اراسىندا بارىس-كەلىستىڭ قالىپقا تۇسۋىنە باستاماشىلىق ءرول اتقارادى دەپ سانايدى.

ەكى ەل اراسىنداعى تىكەلەي بايلانىس قوڭىراۋ جەلىسى 2016 جىلدىڭ اقپان ايىنان باستاپ توقتاتىلعان. بۇل سولتۇستىك كورەيانىڭ ءتورتىنشى رەتكى يادرولىق سىناقتارىنا تۋرا كەلگەن ەدى. وڭتۇستىك كورەيا بولسا ەكى ەلدىڭ بىرلەسكەن كاسىپورىن يندۋستريالىق ورتالىعىنىڭ جۇمىسىن توقتاتتى.

وڭتۇستىك كورەيا ۇكىمەتىنىڭ مالىمدەمەشىسى سوزىندە سولتۇستىك كورەيا تاراپى يادرولىق قارۋلار جايىندا تالقىلاۋعا نيەت تانىتپاعان. ونىڭ ايتۋىنشا، وسىعان دەيىن وڭتۇستىك كورەيا يادرولىق قارۋلار جونىندە ءتىل تابىسۋعا بارلىق مۇمكىندىكتەرىن سالعان.

العىس سەرىكۇلى

“The Qazaq Times”