كرەمل وپپوزيتسيا باسشىسى الەكسەي ناۆالنىيدىڭ قولداۋشىلارىمەن بىرگە داۋىس بەرۋ پروتسەسىنە بويكوت جاريالايتىنى تۋرالى مالىمدەمەسىنىڭ زاڭدىلىعىن تەكسەرۋ كەرەكتىگىن ايتتى. ناۆالنىي 2018 جىلدىڭ ناۋرىزىندا وتەتىن پرەزيدەنت سايلاۋىنان شەتتەتىلسە وسىنداي ارەكەتكە باراتىنىن مالىمدەگەن. ساراپشىلار بولسا كرەملدىڭ بۇل مالىمدەمەسى الەكسەي ناۆالنىيعا جاسالعان ەسكەرتۋ دەپ باعالادى. بۇل تۋرالى ۆۆس اقپاراتتىق اگەنتتىگى جازدى. 

رەسەيدىڭ مەملەكەت باسشىسى ۆلاديمير پۋتين  پرەزيدەنت سايلاۋىنا قاتىساتىنى رەسمي تۇردە جاريالاندى.  ماسكەۋدە ونى قولداۋ ءۇشىن جينالعان 500-گە جۋىق ءانشى، سپورتشى جانە وزگە دە مادەني قايراتكەرلەردىڭ قاتىسۋىمەن وتكەن جيىنعا پرەزيدەنت ءوزىنىڭ قاۋىرت جۇمىسىن العا تارتىپ، قاتىسپادى. جاقىن كۇندەرى ول كانديدات ەسەبىندە تىركەلۋ ءۇشىن، ورتالىق سايلاۋ كومميسسياسىنا قۇجاتتارىن تاپسىرادى.

وسى اپتانىڭ باسىندا ورتالىق سايلاۋ كومميسسياسى الەكسەي ناۆالنىيدىڭ سايلاۋعا قاتىسۋىنا رۇقسات بەرمەۋ تۋرالى شەشىم قابىلدادى. ول ءپۋتيننىڭ جالعىز قارسىلاسىنسىز وتەتىن سايلاۋ ميلليونداعان رەسەيلىكتەردى تاڭداۋ قۇقىعىنان ايىراتىنىن ايتىپ، مەملەكەت باسشىسى لاۋازىمىنا تالاس ءادىل وتەتىنىنە كۇمان كەلتىردى. ول قولداۋشىلارىن سايلاۋعا بويكوت جاريالاپ، داۋىس بەرۋشىلەردىڭ قارسىلىعىن ۇيىمداستىرۋعا شاقىردى.

كرەملدىڭ ءباسپاسوز حاتشىسى دميتري پەسكوۆ: "حالىقتى بويكوتقا شاقىرۋدىڭ زاڭعا سايكەستىگىن مۇقيات تەكسەرۋ كەرەك", - دەدى. ۆلاديمير پۋتين وسىعان دەيىن  الەكسەي ناۆالنىيدى ناقتى باعدارلاماسى جوق، ەلدى حاوسقا باستايتىن تۇلعا رەتىندە سيپاتتاعان ەدى. رەسەي پرەزيدەنتى بۇل جولى سايلاۋعا "ەدينايا روسسيا" پارتياسى اتىنان ەمەس، جەكە كانديدات ەسەبىندە قاتىساتىن بولادى. ۆۆس ءتىلشىسى بۇل شەشىمدى حالىقتىڭ اراسىندا بيلەۋشى پارتيانى قولداۋ دەڭگەيىنىڭ تومەن بولۋىنا بايلانىستى، وعان قارسى جاعىمسىز كوزقاراستان ارىلىپ، جەكە دارا جەڭىسكە جەتۋدىڭ جولى دەپ كورەدى.

ەۋرووداق الەكسەي ناۆالنىيدى سايلاۋعا قاتىستىرماۋ، ونىڭ ءادىل وتەتىندىگىنە دەگەن سەنىمدى ازايتاتىنىن جەتكىزدى. جەمقورلىققا قارسى نارازىلىق شەرۋلەرىن ۇيىمداستىرۋشى الەكسەي ناۆالنىيعا وسىدان بۇرىن "قارجى كوزدەرىن اسىرا پايدالانعان" دەگەن ايىپپەن 5 جىل شارتتى مەرزىمدە جازا وتەۋگە  ۇكىم شىعارىلعان.

“The Qazaq Times”