فوتو: TASS

وپپوزيتسيا كوشباسشىسى الەكسەي ناۆالنىي رەسەيدە 2018 جىلدىڭ ناۋرىزىندا وتەتىن پرەزيدەنتتىك سايلاۋدا قازىرگى مەملەكەت باسشىسى ۆلاديمير پۋتينگە قارسى تۇرۋعا جەتكىلىكتى مولشەردە كانديدات جيناپ ۇلگەرگەنىن حابارلادى. ول جەمقورلىق فاكتىسى بويىنشا تاعىلعان ايىپتاۋلارعا سايكەس، پرەزيدەنت سايلاۋىنا قاتىسۋدان شەتتەتىلگەن بولاتىن. وپپوزيتسيا ونى سايلاۋعا قاتىستىرماۋ ساياسي موتيۆتەرگە نەگىزدەلگەن شەشىم ەكەنىنە سەنىمدى. بۇل تۋرالى ۆۆس اقپاراتتىق اگەنتتىگى جازدى. 

الەكسەي ناۆالنىيدىڭ قولداۋشىلارى رەسەيدىڭ 20 قالاسىندا كەزدەسۋلەر وتكىزىپ، داۋىس بەرۋشىلەردىڭ قولىن جينادى. ماسكەۋدە بولعان جيىندا ول ۆلاديمير ءپۋتيندى "جامان پرەزيدەنت" دەپ اتادى. سونداي-اق، ءوز جاقتاستارىنا مەملەكەت سايلاۋعا قاتىسۋعا رۇقسات بەرمەسە، ەلدەگى ەڭ ماڭىزدى دەموكراتيالىق وقيعاعا بويكوت جاريالايتىنىن ايتقان الەكسەي ناۆالنىي وسىعان دەيىن ۆۆس Hardtalk-كە بەرگەن سۇحباتىندا ەشقانداي كەدەرگىگە قاراماستان، سوڭىنا دەيىن كۇرەسەتىنىن حابارلاعان بولاتىن.

ماسكەۋدە ونداعان ازاماتتاردىڭ "رەسەيگە بوستاندىق كەرەك!", "پۋتين-ۇرى" دەگەن ۇراندارمەن وتكەن شەرۋى "راديو سۆوبودانىڭ" Facebook-تاعى تىكەلەي ەفيرى ارقىلى كورسەتىلدى. پوليتسيا بۇل شارانى زاڭسىز دەپ تاپقانىمەن، قاتىسۋشىلاردىڭ ەشبىرى تۇتقىندالعان جوق.

ءبىر عانا ماسكەۋدىڭ وزىنەن الەكسەي ناۆالنىي 500-گە جۋىق داۋىس جينادى. ول حالىقتىڭ الدىنا شىعىپ سويلەگەن سوزىندە ۆلاديمير پۋتين بارلىعى ويلاعانداي، رەسەيدە ۇلكەن قولداۋعا يە ەمەستىگىن جەتكىزىپ، ەگەر وعان نەگىزگى اقپارات قۇرالدارى ارقىلى سايلاۋالدى كامپانياسىن جۇرگىزۋگە رۇقسات بەرسە، ءسوزسىز جەڭىسكە جەتەتىنىن مالىمدەدى.

الەكسەي ناۆالنىيدىڭ ستراتەگياسى بويىنشا، مۇنداي باسقوسۋلار مەن حالىقتىق كەزدەسۋلەر رەسمي بيلىكتى ونى الداعى پرەزيدەنتتىك سايلاۋعا كانديدات ەسەبىندە تىركەۋگە ماجبۇرلەيدى. ورتالىق سايلاۋ كومميسسياسىنا قۇجاتتارىن وتكىزگەن وپپوزيتسيا باسشىسى ءوزىنىڭ تىركەلگەنى نە سايلاۋعا قاتىسپايتىنى تۋرالى جاۋاپتى جاڭا جىلعا دەيىن بىرنەشە كۇننىڭ ىشىندە الاتىنى حابارلاندى.

الەكسەي ناۆالنىي بيىل ءوزىنىڭ ءتورتىنشى پرەزيدەنتتىك مەرزىمىنە اياق باسقالى وتىرعان ۆلاديمير پۋتينگە قارسىلاس بولۋعا لايىقتى جالعىز كانديدات ەسەبىندە باعالانادى. پرەزيدەنت سايلاۋىنا قاتىساتىنى جونىندە مالىمدەگەن كسەنيا سوبچاكتى ناۆالنىي "كرەملدىڭ قولدان جاساعان كانديداتى" دەپ اتاعان بولاتىن.

“The Qazaq Times”