اقش-تا قازاقستان ازاماتى احرور سەيداحمەتوۆ 15 جىلعا سوتتالدى – دەپ حابارلايدى «گولوس امەريكي» اقپارات اگەنتتىگى.

جەلتوقسان ايىنىڭ 20-سى كۇنى اقش فەدەرالدى سوتى قازاقستان تۋماسى، برۋكلين قالاسىنىڭ تۇرعىنى احرور سەيداحمەتوۆتى «تەرروريزم» بابى بويىنشا، 15 جىلعا باس بوستاندىعىنان ايىرعان. اقش ادىلەت مينيسترلىگىنىڭ مالىمەتىنشە، احرور سەيداحمەتوۆ «يسلام مەملەكەتى» لاڭكەستىك ۇيىمىنا ماتەريالدى كومەك كورسەتۋ ماقساتىندا تەررورلىق ۇيىمىمەن بايلانىس ورناتقان. ول 2014 جىلدان بەرى «يسلام مەملەكەتى» لاڭكەستىك ۇيىمىمەن بايلانىس جاساپ كەلگەن. سەيداحمەتوۆتىڭ باستى ماقساتى جانە ارمانى «يسلام مەملەكەتى» ۇيىمى سودىرلارىنىڭ قاتارىندا بولىپ، سوعىسۋ بولعان.

ەستەرىڭىزگە سالايىق، احرور سەيداحمەتوۆ 2015 جىلى ستامبۇل قالاسىنا بارار جولدا ۇستالعان. كەيىننەن ونىڭ تۇركيا ارقىلى سۇرياعا وتپەك بولعاندىعى انىقتالعان. سەيداحمەتوۆ اقش-تا جازاسىن وتەپ بولعانان كەيىن، قازاقستانعا دەپورتاتسيالانادى.

“The Qazaq Times”