ۆەنەسۋەلا پرەزيدەنتى الەۋمەتتىك شىعىنداردى ارتتىرۋعا ۋادە بەردى

ۆەنەسۋەلا پرەزيدەنتى نيكولاس مادۋرو 2018 جىلى الەۋمەتتىك جاعدايلار ءۇشىن جۇمسالاتىن بيۋدجەت شىعىندارى 70%-دان اساتىنىنا ۋادە بەردى. بۇل تۋرالى Union Radio راديوستانتسياسى حابارلادى، دەپ جازدى ربك.

ء"بىز مەملەكەت بيۋدجەتىنىڭ 72%-ىن الەۋمەتتىك ساياسات شىعىندارىنا، ياعني مادەنيەتكە، بىلىمگە، دەنساۋلىق ساقتاۋ سالاسىنا، تۇرعىن ۇيگە، دەمالۋ جانە سپورتقا جۇمسايتىن  بولامىز", - دەدى مادۋرو.

بۇدان بولەك ول ەل ۇكىمەتى ۆەنەسۋەلاعا قارسى جاسالعان بارلىق ەكونوميكالىق سوعىس ارەكەتتەرىمەن كۇرەسەتىنىن ايتقان.

ايتا كەتەيىك، 2014 جىلدان باستاپ مۇناي باعاسىنىڭ قۇلدىراۋى سالدارىنان ۆەنەسۋەلادا باستالعان ەكونوميكالىق داعدارىس كۇن وتكەن سايىن قيىنداپ بارادى. مىسالى Standard & Poors حالىقارالىق رەيتينگ اگەنتتىگى (S & P) پايىزدىق تولەمدەر بەلگىلەنگەن مەرزىمدە تولەنبەۋىنە بايلانىستى ۆەنەسۋەلانىڭ شەتەل ۆاليۋتاسىنداعى مىندەتتەمەلەرىن دەفولتتى دەڭگەيىنە دەيىن تومەندەتتى.

سونداي-اق، ەلدەگى ەكونوميكالىق جانە گۋمانيتارلىق داعدارىس دەڭگەيى ينفلياتسيا جانە ۇلتتىق ۆاليۋتانىڭ قۇنسىزدانۋىمەن قاتار ۇلعايا تۇسكەن. حالىقارالىق ۆاليۋتا قورى ەلدەگى "تۇتىنۋ باعاسىنىڭ ءوسىمى 2018 جىلى 2349,3% دەڭگەيىندە بولادى" دەگەن بولجام ايتىپ وتىر.

مۇناي باعاسىنىڭ قۇلدىراۋى تەك ۆەنەسۋەلا ەمەس، مۇنايلى قازاقستانعا دا وڭاي اسەر ەتكەن جوق. ۇلتتىق قوردىڭ ءبىراز بولىگى ەكونوميكالىق شىعىنداردى جابۋعا جۇمسالدى. تەڭگە قۇنسىزدانىپ، حالىقتىڭ الەۋمەتتىك جاعدايى تومەندەدى.

“The Qazaq Times”