«قازاق ەنتسيكلوپەدياسى» باسپاسىنىڭ 50 جىلدىعىنا ارنالعان كونفەرەنتسيا ءوتتى

2017 جىلعى 14 جەلتوقساندا قر ۇلتتىق كىتاپحاناسىنداعى ەرمەك تۇرسىنوۆ كينوكلۋبىندا «قازاق ەنتسيكلوپەدياسى» باسپاسىنىڭ 50 جىلدىق مەرەيتويىنا ارنالعان «ۇلت رۋحىن جاڭعىرتقان جارتى عاسىر» اتتى كونفەرەنتسيا ءوتتى. كونفەرەنتسيا بارىسىندا «قازاق ەنتسيكلوپەدياسى» اتتى انىقتامالىق پەن «ماڭگىلىك ەل» فوتوالبوم جيناقتارىنىڭ تۇساۋى كەسىلدى.

«قازاق ەنتسيكلوپەدياسى» ەنتسيكلوپەديالىق انىقتامالىعى – جالپى قازاق باسپالارىنىڭ تاريحىندا باسپا جەتىستىكتەرىنەن، تاريحىنان اقپارات بەرەتىن تۇڭعىش باسىلىم. «ماڭگىلىك ەل» فوتوالبومى 2017 جىلى وتكەن «ەكسپو» كورمەسىندە گران-پري جۇلدەسىن جەڭىپ العان باسپا ءونىمى.   كونفەرەنتسياعا قر مادەنيەت جانە سپورت مينيسترلىگىنىڭ وكىلدەرى، الماتى قالاسى اكىمىنىڭ ورىنباسارى، قر ۇلتتىق كىتاپحاناسىنىڭ ديرەكتورى جانات تۇرارۇلى سەيدۋمانوۆ، قر ۇلتتىق كىتاپ پالاتاسىنىڭ ديرەكتورى الىبەك اسىلبايۇلى اسقاروۆ، قر ۇلتتىق عىلىم اكادەمياسىنىڭ اكادەميگى، فيلوسوفيا عىلىمدارىنىڭ دوكتورى، پروفەسسور، قازاقستان رەسپۋبليكاسى ءبىلىم جانە عىلىم مينيسترلىگى فيلوسوفيا ينستيتۋتىنىڭ ءدىنتانۋ جانە ساياساتتانۋ كوميتەتى ديرەكتورىنىڭ كەڭەسشىسى ابدىمالىك نىسانبايۇلى نىسانباەۆ، قر ءبىلىم جانە عىلىم مينيسترلىگى عىلىم كوميتەتى مەملەكەت تاريحى ينستيتۋتىنىڭ ديرەكتورى، تاريح عىلىمدارىنىڭ دوكتورى، پروفەسسور بۇركىتباي عەلمانۇلى اياعان، قازاق ۇلتتىق ۋنيۆەرسيتەتى رەكتورىنىڭ عىلىمي كەڭەسشىسى، قازاقستان رەسپۋبليكاسى ۇلتتىق عىلىم اكادەمياسىنىڭ كوررەسپوندەنت مۇشەسى، فيلولوگيا عىلىمدارىنىڭ دوكتورى، پروفەسسور باۋىرجان ءومىرجانۇلى جاقىپ، ولاردان دا بولەك ءبىر كەزدەرى باسپاعا اۆتور بولىپ قاتىسقان، قىزمەت ىستەگەن عالىمدار مەن مەملەكەت قايراتكەرلەرى قاتىستى.

قازاقستاندا ەنتسيكلوپەديالىق باسپا قازاقستان كومپارتياسى ورتالىق كوميتەتى مەن قازاق كسر مينيسترلەر كەڭەسىنىڭ 1967 جىلعى 13 قىركۇيەكتەگى قاۋلىسىنا سايكەس 1968 جىلى 1 قاڭتاردا قازاق كسر عىلىم اكادەمياسىنىڭ جانىنان قازاق سوۆەت ەنتسيكلوپەدياسىنىڭ باس رەداكتسياسى بولىپ قۇرىلعانى بەلگىلى. 1993 جىلى «قازاق ەنتسيكلوپەدياسىنىڭ» باس رەداكتسياسى بولىپ وزگەردى. العاشىندا 12 تومدىق شىعىپ بولعانشا 10 جىلداي اكادەميك مۇحامەدجان قاراتاەۆ (1968 – 79) باسقارعان ۇجىمعا ودان كەيىنگى كەزەڭدەردە اكادەميكتەر ماناش قوزىباەۆ (1980 – 86), رىمعالي نۇرعالي (1986  – 97), ابدىمالىك نىسانباەۆتار (1997 – 2003) جانە پروفەسسورلار بۇركىتباي اياعان (2003 – 09) مەن باۋىرجان جاقىپتار (2009 – 2015) باسشىلىق ەتتى. قازىرگى كەزدە باسپانى فيلوسوفيا دوكتورى (PgD) جادىرا نۇربايقىزى تويباەۆا باسقارادى.

باسپالار جۇيەسىندە ەنتسيكلوپەديالىق ادەبيەتتەردىڭ جانرى، ادەبي، عىلىمي كريتەريى مەن ءستيلى، تەحنيكالىق جۇيەسى ء(الىپبي، قىسقارتۋلار، ت.ب.) قالىپتاستى. 50 جىلدا بىرنەشە جۇزدەگەن ەنتسيكلوپەديالىق جيناقتار جارىق كورىپ، وقىرمان ەنتسيكلوپەديالىق اقپاراتپەن بارىنشا تولىق قامتاماسىز ەتىلدى. تاۋەلسىزدىك جىلدارى جارىق كورگەن كوپ تومدىق ۇلتتىق ەنتسيكلوپەديادان باستاپ، تۇلعالىق جانە سالالىق ەنتسيكلوپەديالار حالقىمىزدىڭ ۇلتتىق تانىمى مەن رۋحىن كوتەرۋگە ولشەۋسىز ۇلەس قوستى.

كونفەرەنتسيا بارىسىندا باسپاعا ەڭبەگى سىڭگەن ەلەۋلى ازاماتتارعا ءار ءتۇرلى ماراپاتتارتاپسىرىلدى.ماراپاتتاردىڭ اراسىندا قر مادەنيەت قايراتكەرى اتاعىنان باستاپ، ءارتۇرلى مەدالدار، قۇرمەت گراموتالارى مەن العىس حاتتار بار. ماراپاتتاردىقر مادەنيەت جانە سپورت مينيسترلىگى، قازاقستان باسپاگەرلەرى، پوليگرافيستەرى جانە كىتاپ تاراتۋشىلار قاۋىمداستىعى جانە «قازاق ەنتسيكلوپەدياسى» باسپاسى تاپسىردى.

“The Qazaq Times”