ميانما ۇكىمەتى سارسەنبى كۇنى Reuters اگەنتتىگىنىڭ ەكى ءتىلشىسى ۆا لوۋن مەن كياۆ سو وو-دى پوليتسيا تۇتقىنداعانىن مالىمدەدى. جۋرناليستەر راكين شتاتىندا اسكەريلەردىڭ روحيندجا مۇسىلماندارىن قۋعىنداعانى جونىندە ماتەريال ازىرلەگەن. بۇل تۋرالى ورتالىق ازيا جاڭالىقتار قىزمەتى حابارلادى.

ميانمانىڭ اقپارات مينيسترلىگى Facebook-تەگى پاراقشاسىندا ەكى جۋرناليستكە بريتاندىق كولونيالدىق داۋىرىنەن بەرى بار مەملەكەتتىك قۇپيا جونىندەگى زاڭعا سايكەس ايىپتالىپ جاتقانىن مالىمدەگەن. 1923 جىلدان بەرى قولدانىستاعى زاڭدا 14 جىلعا دەيىن تۇرمە جازاسى قاراستىرىلعان.

مالىمدەمەدە "جۋرناليستەر شەتەلدىك باق-قا تاراتۋ ءۇشىن اقپاراتتى زاڭسىز الدى" دەلىنگەن. ولار ميانمانىڭ باستى قالاسى رانگۋندا ۇستالعان.

ۆا لوۋن پەن كياۆ سو Oo سەيسەنبىدەن بەرى ءىز-ءتۇسسىز جوعالىپ كەتكەن. Reuters وكىلدىگىنىڭ جۇرگىزۋشىسى ەكى ءجۋرناليستى كەشكىسىن پوليتسيا بولىمىنە اكەلگەن. ودان كەيىن ەكى ءتىلشى مەن ەكى پوليتسيا وكىلى تاماقتانۋعا مەيرامحاناعا كەتكەن. جۇرگىزۋشى سودان كەيىن ولاردى كورمەگەن.

“The Qazaq Times”