رەسەي سىرتقى ىستەر ءمينيسترى سەرگەي لاۆروۆ.

رەسەي سىرتقى ىستەر ءمينيسترى سەرگەي لاۆروۆ «ورتالىق ازيا ەلدەرى اۋعانستان ماسەلەسىن شەشۋگە اتسالىسۋى ءتيىس» - دەپ مالىمدەدى.

جەلتوقسان ايىنىڭ 11-ءى كۇنى رەسەي سىرتقى ىستەر ءمينيسترى سەرگەي لاۆروۆ ۆيۆيكانان حالىقارالىق قورىندا اۋعانستانداعى جاعدايلارعا بايلانىستى ءسوز سويلەگەن. ول وندا: «ءبىزدىڭ ويىمىزشا اۋعانستان ماسەلەسىن شەشۋگە رەسەي، اقش، پاكىستان، يران، ءۇندىستان جانە قىتايدان بولەك، ورتالىق ازيا ەلدەرى دە اتسالىسۋى ءتيىس. اۋعانستان داعدارىسى اتالمىش ماسەلەگە قاتىسى بار بارلىق مەملەكەتتەر بەلسەندىلىك تانىتقاندا عانا شەشىلەتىن بولادى. ءبىز بۇعان دەيىن «ماسكەۋ كەلىسىمىن» ۇيىمداستىرعانبىز. بىراق وعان اقش قاتىسۋدان باس تارتتى.قازىر ءۇندىستان مەن پاكىستان شانحاي ىنتىماقتاستىق ۇيىمىنا مۇشە. وسىعان بايلانىستى ءبىز قازان ايىندا شانحاي ىنتىماقتاستىق ۇيىمى اياسىندا اۋعانستان داعدارىسىنا قاتىستى وتىرىس وتكىزدىك. كەلەسى باس قوسۋ 2018 جىلى قىتايدا وتەدى دەپ جوسپارلانۋدا» - دەگەن.

شەتەلدىك ساراپشىلاردىڭ سوزىنشە، رەسەيدىڭ اۋعانستان ماسەلەسىنە ورتالىق ازيا ەلدەرىن ارالاستىرۋداعى باستى ماقساتى اقش پەن ناتو-عا قارسى تۇرۋ. سەبەبى سوڭعى ۋاقىتتارى اۋعانستاندا اقش پەن ناتو اسكەر سانىن ارتتىرىپ، ەلدەگى «يسلام مەملەكەتى» لاڭكەستىك ۇيىمى مەن «تاليبان» قوزعالىسىنا قارسى كۇرەستى كۇشەيتكەن. بۇل گەوساياسات تۇرعىسىندا رەسەيگە ءتيىمسىز. قازىرگى تاڭدا ورتالىق ازيا ەلدەرى ىشىندە اۋعانستانمەن تىعىز بايلانىس ورناتىپ، قارىم-قاتىناسىن كۇشەيتكەن وزبەكستان عانا. جاقىندا ەل پرەزيدەنتى شاۆكات ميرزيەەۆ تاشكەنت قالاسىندا اۋعانستان باسشىسى اشراف گانيدى قابىلداپ، قاۋىپسىزدىك، ترانسپورت جانە ەسىرتكىمەن كۇرەس سالالارى بويىنشا بىرنەشە قۇجاتقا قول قويعان.

“The Qazaq Times”