بالتاسار گراسيان (1601-1658) يسپانيانىڭ سولتۇستىك شىعىسىنداعى بەلمونتە ەلدى مەكەنىندە دۇنيەگە كەلگەن. يسپاندىق ويشىل، جازۋشى جانە حريستان ءدىن قايراتكەرى. ساراگوسادا ءدىن وقۋىن وقىقان. كەيىن حريستان ءدىن ۋاعىزشىسى بولعان. ونىڭ ءومىرى قۇدايشىلدىق، ءدىن تاراتۋشى، پوپ، جازۋشى سىندى سيپاتتامالارعا تولى. «قاھارمان» 1638ج.، «اقىليالار» 1641ج. قاتارلى ايگىلى ەڭبەكتەر جازعان.

ءبىز تومەندە ايگىلى ويشىلدىڭ ابىلاش قاسىمبەكۇلى مەن قاۋسىلقان قاسىمحانۇلى اۋدارعان «پاراستاناما» كىتابىنان ۇزىندىلەر ۇسىنىپ وتىرماقپىز.

الەمدەگى زاتتاردىڭ بارلىعى دا كەمەلدى

الەمدەگى زاتتاردىڭ بارلىعى دا كەمەلدى. ال سولاردىڭ ىشنىدەگى ەڭ كەمەلدىسى – شىن مانىندە كىسىلىگى بار ادام.

بۇگىنگى كۇنى ءبىر اۋليەنى دايىنداۋ كونە گرەكتىڭ جەتى اۋليەسىن دايىنداۋدان دا قيىن. ال، ءبىر ادامدى كەمەلدەندىرۋگە جۇمسالاتىن زەيىن-زەردە، كۇش-قۋات بۇرعىنعى تۇتاس ءبىر ۇلتتى كەمەلدەندىرۋگە جۇمسالاتىن زەيىن-زەردە مەن كۇش-قۋاتتان دا كوپ.

مىنەز بەن اقىل ەگىز

تۋمىسىڭنان دارىعان قابىلەتتى تولىق ساۋلەلەندىرمەك بولساڭ، وعان مىنەز بەن اقىلدى تايانىش ەتۋىڭ كەرەك. بۇل ەكەۋىنىڭ ءبىرى كەم بولسا، تابىسقا جارتىلاي جەتەسىڭ. تەك اقىلدى بولۋ جەتكىلىكتى بولمايدى، وعان قوسا جاعىمدى مىنەز دە كەرەك. اقىماقتاردىڭ تابىسقا جەتە المايتىندىعى، بىردەڭە ىستەگەندە ءوز جاعدايىمەن، ورنىمەن، تەگىمەن جانە دوستارىمەن ساناسپايتىندىعىندا.

اشىق اۋىز بولما

شەبەرلىكپەن ۇتىپ كەتۋ، كوبىنە كوپ، ناعىز سۇيىنەرلىك ءىس. ءوزىڭدى كورسەتۋدىڭ پايداسى دا، قىزىعارلىعى دا جوق. ەلپىلدەپ كەتپەي سالماقتىلىق تانىتۋ جۇرتتى ويلاندىرادى، اسىرەسە سەنىڭ مارتەبەڭ ۇستەم بولىپ، جۇرتتى ابدەن ۇمىتتەندىرگەندە، بايىبىنا بارا الماس سىرلىلىق سەنى قۇرمەتكە بولەيدى. شىندىقتى ايتۋعا تۋرا كەلگەن كۇندە دە، تۇك قالدىرماي «لاق» ەتكىزۋدەن ساقتانعان ابزال. باسقالارعا سىرىڭدى الدىرما. بايىپتى ۇنسىزدىك – زەيىندى قورعانىس. كوڭىلىڭە بۇككەن تۇجىرىمدى دابىرا قىلۋ قۇرمەتكە يە ەتكەندى بىلاي قويىپ، سوزگە قالدىرادى. جاساعان شەشىمىڭنەن بولماشى اعاتتىق شىقسا، سورىڭ قالىڭداي تۇسەدى. ەگەر باسقالاردىڭ نازارىن اۋدارىپ، قۇرمەتىنە بولەنەم دەسەڭ، ءتاڭىردى ونەگە تۇت، سىرىڭدى سىرتقا شاشپا.