تيللەرسون مەن لاۆروۆ ۆەنادا كەزدەستى. فوتو: ريا نوۆوستي.

اۆستريانىڭ استاناسى ۆەنادا وتكەن ەۋروپا قاۋىپسىزدىك جانە ىنتىماقتاستىق ۇيىمىنىڭ 24-ءشى كەزەك وتكىزىلىپ وتىرعان مينيسترلەر جينالىسى كەزىندە، رەسەيدىڭ سىرتقى ىستەر ءمينيسترى سەرگەي لاۆروۆ اقش مەملەكەتتىك حاتشىسى رەكس تيللەرسونمەن كەزدەستى. بۇل تۋرالى «شينحۋانىڭ» رەسمي سايتى جازدى.

اقش پەن رەسەي اراسىندا سوڭعى ءبىر جىلدا شيەلەنىستەر ۋشىعا ءتۇستى. ەكى ەلدىڭ ديپلوماتيالىق داعدارىسىن ساراپشىلار «قىرعي-قاباق سوعىسى» جىلدارىنا تەڭەگەن بولاتىن. سەرگەي لاۆروۆ پەن تيللەرسوننىڭ كەزدەسۋى كەزىندە ەكى ەل ورتاسىندا قوردالانعان بىرقاتار باستى ماسەلەلەر ءسوز ەتىلدى. ونىڭ ىشىندە ءبىر-ءبىرىنىڭ مەديا قۇرالدارىنا جاساعان شەكتەۋ ءىسى جانە ءسۇريا مەن سولتۇستىك كورەيا تاقىرىبى دا بار.

كەزدەسۋدەن كەيىن رەسەي ءسىم-ءى جازباشا مالىمدەمە تاراتقان. وندا رەسەي جاق كورەي تۇبەگى ماسەلەسىن ماڭىزدى كۇن تارتىپكە ەنگىزگەنى، سولتۇستىك كورەياعا قاراتا اقش ۇستانىمىن اسىرا سىلتەۋشىلىك دەپ باعالاعانى تۋرالى ايتىلعان. ءارى، اقش ۇستانىمىنان تۋىنداعان داعدارىستار مەن ۇشقارى سوزدەردى ماقۇلدامايتىنىن جەتكىزگەن.

رەسەي جاق سونىمەن بىرگە كورەي تۇبەگى قايشىلىعىن تەك ديپلوماتيالىق جولدارمەن شەشۋ ءۇشىن جاڭا تاسىلدەر ىزدەۋ تۋرالى ۇسىنىس ايتقان. مالىمدەمەدە ماسكەۋ تارابى سولتۇستىك كورەيا تاقىرىبى بويىنشا اقش-پەن كەلىسسوز جۇرگىزۋگە دايىن ەكەنىن دە جەتكىزگەن. بىراق اتالعان جازباشا حابار مازمۇنىندا رەسەي مەن اقش اراسىنداعى نەگىزگى شيەلەنىستەر مەن ديپلوماتيالىق داعدارىستار تۋرالى وربىگەن سوزدەرگە ورىن بەرىلمەگەن.

“The Qazaq Times”