قارجى جىمقىردى دەگەن ايىپ تاعىلعان قازاقستاندىق شەنەۋنىكتەر مەن وليگارحتار رەسەي، قىرعىزستان، موڭعوليا، ءباا، اقش جانە ءازىربايجان ەلدەرىندە جاسىرىنىپ ءجۇر.

قازاقستان رەسپۋبليكاسىنىڭ قارجى مينيسترلىگىنە قاراستى مەملەكەتتىك كىرىستەر كوميتەتىنىڭ ءباسپاسوز قىزمەتى تاراتقان مالىمەت بويىنشا، كوميتەت قىزمەتكەرلەرى 2017 جىلى ەلىمىزدە ەكونوميكالىق قىلمىس جاساپ، رەسەي، ءازىربايجان، قىرعىزستان، موڭعوليا، ءباا جانە اقش-تا جاسىرىنىپ جۇرگەن 22 قازاقستاندىق ازاماتتى انىقتاعان. قازىرگى تاڭدا باس پروكۋراتۋرا ولاردى قازاقستانعا ەكستراديتسيالاۋعا بايلانىستى جۇمىستار جۇرگىزۋدە.

ىزدەۋدە جۇرگەن ازاماتتاردىڭ باسىم كوپشىلىگىنە سەنىپ تاپسىرىلعان دۇنيە-مۇلىكتى تالان-تاراجعا سالۋ، جالعان كاسىپكەرلىكپەن اينالىسۋ، سالىق تولەۋدەن جالتارۋ، ەكونوميكالىق كونتراباندامەن اينالىسۋ باپتارى بويىنشا ايىپ تاعىلعان.

“The Qazaq Times”