سوت كاتالونيانىڭ تۇتقىندالعان باسشىلارىن بوساتۋدان باس تارتتى

يسپانيا سوتى كاتالونيانىڭ بۇرىنعى ۆيتسە-پرەزيدەنتى مەن ونىڭ جانىنداعى  ءۇش سەرىكتەسىن بوستاندىققا شىعارۋدان باس تارتتى. سەپاراتيستىك قوزعالىس باسشىلارى كاتالونيادا 21 جەلتوقسانعا بەلگىلەنگەن سايلاۋعا كەدەرگى كەلتىرۋى مۇمكىن دەگەن كۇدىكتەن اباقتىدا قالاتىن بولدى. ولارمەن قاتار تۇتقىندالعان التى ەكس-مينيستر ارقايسىسى 100 مىڭ ەۋرو كولەمىندە ايىپپۇل تولەپ، ازات ەتىلدى. بۇل تۋرالى APF اقپاراتتىق اگەنتتىگى جازدى. 

ەكس-مينيسترلەردى بوستاندىققا شىعارۋ ءۇشىن ايىپپۇل قۇنىن تولەۋدى ءوز موينىنا العان كاتالونيانىڭ بۇرىنعى ۇلتتىق اسسامبلەياسى دۇيسەنبى كۇنى اباقتىداعى وزگە ساياسي تۇتقىنداردىڭ ازات ەتىلۋىن تالاپ ەتىپ، نارازىلىق شەرۋىن ۇيىمداستىردى.

سونىمەن قاتار بەلگيادا كاتالونيانىڭ بۇرىنعى باسشىسى كارلەس پۋدجەمونت پەن ونىڭ جاقىن ءۇش ارىپتەسىن يسپانياعا ەكستراديتسيالاۋ ماسەلەسى بويىنشا سوت وتىرىسى بولىپ ءوتتى. بريۋسسەل سوتى يسپانيا ۇكىمەتىنىڭ كاتالان باسشىلارىن ءوز ەلىندە جازاعا تارتۋ ءۇشىن قايتارۋ تۋرالى ءوتىنىشىن قاناعاتتاندىراتىنىن نە باس تارتاتىنىن 14 جەلتوقسان كۇنى ايتادى.

كاتالونيانىڭ ءتورت بىردەي كوشباسشىسىنىڭ تۇرمەدە قالۋى الداعى سايلاۋدا ءوز كانديداتۋراسىن ۇسىناتىن سەپاراتيستەردىڭ يسپانيانى ساياسي رەپرەسسياعا ايىپتاۋىنا جول اشۋى مۇمكىن. كارلەس پۋدجەمونتتىڭ قورعاۋشىسى ونىڭ سايلاۋعا دەيىن بەلگيادا قالاتىنىن حابارلادى. كاتالونيانىڭ بۇرىنعى پرەزيدەنتى سايلاۋعا قاتىساتىنىن جەتكىزىپ، تۋعان جەرىنە تەك زاڭدى باسقارۋشى ەسەبىندە عانا قايتقىسى كەلەتىنىن ايتقان بولاتىن.

ەستەرىڭىزگە سالا كەتەيىك، كاتالونيا حالىقتىق رەفەرەندۋم قورىتىندىلارىنا سۇيەنىپ، ءوزىن يسپانيادان تاۋەلسىز تەرريتوريا دەپ جاريالاعانىنان كەيىن، ورتالىق ۇكىمەت بيلىكتى تولىقتاي ءوز قولىنا العان ەدى. كارلەس پۋدجەمونت ءوز جاقتاستارىنىڭ ءبىر بولىگىمەن بەلگياعا قاشىپ، ونى سىرتىنان جازاعا كەسكەن يسپانيا سوتىنىڭ ادىلدىگىنە سەنبەيتىنىن جاريالاعان بولاتىن.

“The Qazaq Times”