فوتو: AFP

اقش-تىڭ جوعارعى سوتى دونالد ترامپتىڭ التى مۇسىلمان مەملەكەتتىڭ ازاماتتارىنىڭ امەريكاعا كىرۋىنە تىيىم سالۋ ۇسىنىسىن قولداۋ تۋرالى ۇكىم شىعاردى. جوعارعى سوت القاسىنىڭ توعىز مۇشەسى چاد، يران، سومالي، ليۆيا، ءسۇريا مەن يەمەن ازاماتتارىنىڭ اقش-قا كەلۋلەرىنە تىيىم سالۋدى قولداسا، بادەر گينزبۋرگ پەن سونيا سوتومايور عانا ترامپتىڭ باستاماسىنا قارسىلىق تانىتتى. بۇل تۋرالى ۆۆس اقپاراتتىق اگەنتتىگى جازدى. 

بوسقىندار مەن جوعارىدا اتالعان مۇسىلمان مەملەكەتتەرىنە قويىلعان شەكتەۋلەر نارازىلىق تۋدىرىپ، ۇزاق تالقىعا تۇسكەن بولاتىن. ۇلتتىق ميگراتسيا ورتالىعىنىڭ باسشىسى كارەن تۋملين سوتتىڭ شەشىمىن "وتە ناشار جاڭالىق" دەپ قابىلدادى. ول مۇسىلمان مەملەكەتتەرىنىڭ ازاماتتارىنىڭ قۇقىعىن قورعاۋ ءۇشىن كۇرەس جالعاساتىنىن جەتكىزدى. وسى اپتادا سان-فرانتسيسكو مەن ريچموندتاعى جەرگىلىكتى اپەلياتسيالىق سوتتار ساياسي شەشىمنىڭ زاڭدى نە زاڭسىز ەكەنىن ساراپقا سالادى.

دونالد ترامپتىڭ ميگراتسيالىق سانكتسيالارى بىرنەشە كەزەڭدى قامتىدى:

  • قاڭتار ايىندا اقش پرەزيدەنتى جەتى مۇسىلمان مەملەكەتىنىڭ ازاماتتارىن 90 كۇنگە قابىلداۋ مەن بوسقىنداردى امەريكا تەرريتورياسىنا كىرگىزۋگە تىيىم سالۋ تۋرالى جارلىققا قول قويدى. ءسۇريا بوسقىندارىن دا قامتىعان گۋمانيتارلىق ميسسياعا كەدەرگى كەلتىرەتىن شەشىم وتە كوپ سىنعا تاپ بولدى.
  • ناۋرىز ايىندا ەنگىزىلگەن وزرىستەر بويىنشا، قارا تىزىمنەن يراك مەملەكەتى الىنىپ تاستالىپ، قوس ازاماتتىعى بارلار مەن "Green" كارتاسىنىڭ يەلەرى ساياسي شەشىمنىڭ قۇرباندارى قاتارىنا كىرمەيتىن بولدى.
  • قىركۇيەك ايىندا دونالد ترامپ جوعارىدا اتالعان التى مۇسىلمان ەلدەرىنىڭ قاتارىنا سولتۇستىك كورەيا مەن ۆەنەسۋەلانى قوستى.

دونالد ترامپتىڭ شەشىمىن اقش سوتتارى ءارتۇرلى قابىلدادى. مەريلەند شتاتىنىڭ سوت القاسىنىڭ مۇشەسى پرەزيدەنتتىڭ دايەكتەرىن ابدەن "اقىلعا قونىمدى" دەپ تاپسا، گاۆايداعى فەدەرالدى سوت جالپى سانى 150 ملن بولاتىن التى مۇسىلمان مەملەكەتىنىڭ ازاماتتارىنا قويىلعان شەكتەۋدىڭ نەگىزگى سەبەبى انىق ەمەستىگىن ايتتى. ۆيردجينيا سوتى بۇل جارلىققا  ء"بىر ادامنىڭ بەلگىلى ءبىر توپقا قارسى ارەكەتى نەگە بۇكىل مەملەكەت ازاماتتارىنا زاردابىن تيگىزۋى كەرەك؟!" دەگەن ساۋالمەن جاۋاپ بەردى.

“The Qazaq Times”