اۋعانستاننىڭ شىعىسىنداعى تاليبان كۇشتەرى. فوتو: BBC.

اۋعانستاننىڭ شىعىس وڭىرىندە «يسلام مەملەكەتى» ۇيىمى مەن تاليبان اراسىندا قاقتىعىس بولىپ 18 ادام وققا ۇشقان. بۇل تۋرالى اۋعانستان اقپارات قۇرالدارىنا سىلتەمە جاساي وتىرىپ، «شينلاڭ» اقپاراتتى سايتى حابارلادى.

ەكى كۇن بۇرىن اۋعانستاننىڭ شىعىسىنداعى نونگارحار پروۆينتسياسىندا جاسىرىنىپ جۇرگەن «يسلام مەملەكەتى» ەكسترەميستىك توپتارى سول ەلدەگى قارۋلى تاليبانمەن قاقتىعىسىپ قالعان. ەكى تاراپتان كەمىندە 18 ادام قازا بولعانى تۋرالى مالىمەت بار.

سول ەلدەگى تەلەارنالاردىڭ حابارىنا قاراعاندا، «يسلام مەملەكەتى» ۇيىمىنان 6 ادام قازا بولىپ، 4 ادام جارالانعان. تاليبان ۇيىمىنان 12 ادام قازا تاۋىپ، كەم دەگەندە 8 ادام جاراقات العان. ەكى قارۋلى توپ سوڭعى اپتالاردا بىرنەشە رەت قاقتىعىسقان، ءار رەتتە كەمىندە بىرنەشە ادام جاراقات العان. ەكى قارۋلى توپ بۇل تۋرالى ءالى دە تۇسىنىكتەمە تاراتپاعان.

بيىل «يسلام مەملەكەتى» ۇيىمى اۋعانستانداعى تاليبان ۇيىمىنا  بىرنەشە رەت شابۋىل جاسادى. ەكى توپتىڭ قاقتىعىسى كوبىندە حۋدجاني شەكارالاس ايماقتارىندا بولىپ وتىر.

تالداۋلارعا قاراعاندا، قارۋلى تەررورلىق توپتار ايماقتاعى ىقپال كولەمىن كەڭەيتۋ ءۇشىن قاقتىعىسادى. بۇل ارەكەتتەر ايماقتىڭ قاۋىپسىزدىك جاعدايىن بارعان سايىن ناشارلاتۋدا. قاقتىعىس بولعان ايماقتاردا كەمىندە 10 مىڭ وتباسى باس ساۋعالاپ قاشىپ كەتكەن. جەرگىلىكتى تۇرعىندار بىرنەشە رەت اۋعانستاننىڭ قاۋىپسىزدىك كۇشتەرىنە الەۋمەتتىك تۇراقتىلىقتى ساقتاۋ ءۇشىن قارۋلى توپتاردى جويۋىن تالاپ ەتتى. دەگەنمەن، جەرگىلكتى ۇكىمەت كۇشتەرىنى ايماقتى تولىق باقىلاۋعا قاۋقارسىز بولىپ كەلەدى.

“The Qazaq Times”