فوتو: LETA

نيدەرلاندى پوليتسياسى گااگاداعى حورۆاتيانىڭ بۇرىنعى گەنەرالى سلوبودان پرالياكقا تاعىلعان ايىپتاردى قايتا قاراستىرۋ بويىنشا اپپەلياتسيالىق سوت وتىرىسى ءوتىپ جاتقان زالدى "قىلمىس ورنى" دەپ جاريالادى. ويتكەنى  72 جاستاعى ايىپتالۋشى ءوزىنىڭ وسىعان دەيىن جاريالانعان ۇكىمى وزگەرىسسىز قالاتىنىن ەستىگەن كەزدە، وزىمەن بىرگە الىپ كەلگەن كىشكەنە قۇتىدان ۋ ءىشىپ، كوپ ۇزاماي اۋرۋحانادا جان تاپسىردى. بۇل تۋرالى ۆۆس اقپاراتتىق اگەنتتىگى جازدى. 

سلوبودان پرالياك يۋگوسلاۆياىڭ بولىنىسىنەن كەيىن قۇرىلىپ، 1995 جىلعا دەيىن قىزمەت اتقارعان حورۆاتيانىڭ قاۋىپسىزدىك كەڭەسىنە مۇشە بولعان. ول حورۆاتيانىڭ قارۋلى كۇشتەرىنىڭ قاتارىندا بوسنيا مەن گەرتسەگوۆيناداعى سەربتەر، حورۆاتتار مەن مۇسىلماندار اراسىنداعى اسكەري وپەراتسيالارعا قاتىسقان.

بۇرىنعى گەنەرال حورۆاتيالىق اسكەر ورىنداعان ەتنيكالىق قىلمىستار مەن مۇسىلماندارعا كورسەتىلگەن زورلىق فاكتىلەرىن توقتاتۋعا ارەكەت جاساماعانى ءۇشىن ايىپتالعان. بارلىق جوسپار مەن اسكەري وپەراتسيالار دىڭ رەتىنەن حاباردار بولا تۇرا، جەرگىلىكتى حالىقتى قورعاۋعا ارەكەت ەتپەگەنى ءۇشىن 20 جىلعا باس بوستاندىعىنان ايىرۋ تۋرالى جازاعا كەسىلگەن پرالياكتىڭ قورعاۋشىسى سوت شەشىمىن اپپەلياتسياعا بەرگەن ەدى. اپپەلياتسيالىق سوت وتىرىسىنىڭ قورىتىندىسى بويىنشا وعان تاعىلعان بىرقاتار ايىپتار الىنىپ تاستالعانىمەن، ۇكىم وزگەرىسسىز قالدى.

سلوبودان پرالياك سوت شەشىمىن ەستىگەن كەزدە: "پرالياك قىلمىسكەر ەمەس. مەن ءسىزدىڭ شەشىمىڭىزدى قابىلدامايمىن!" دەپ، بەلگىسىز قۇتىداعى سۇيىقتىقتى ىشكەن. ارتىنشا ءوزىنىڭ ۋ قابىلداعانىن ايتقان ايىپتالۋشىنى سوت زالىنان جەدەل جاردەم جاقىن ماڭداعى اۋرۋحاناعا الىپ كەتتى. سلوبودان پرالياك كوپ ۇزاماي سول جەردە كوز جۇمدى. قازىرشە ونىڭ بۇل ارەكەتكە نەگە بارعانى، سوت زالىنا ۋ ساقتالعان قۇتىنى قالاي الىپ كىرگەنى بەلگىسىز.

“The Qazaq Times”