فوتو: https://holanews.kz

قازاقستان مەن چەحيا قارىم-قاتىناسى نىعايا تۇسپەك. وسى اپتادا ءماجىلىس توراعاسى نۇرلان نىعماتۋلين مەن قازاقستانعا رەسمي ساپارمەن كەلگەن چەحيا پارلامەنتى دەپۋتاتتار پالاتاسىنىڭ سپيكەرى رادەك ۆوندراچەك ەكى ەلدىڭ پارلامەنتشىلەرى اراسىنداعى ىنتىماقتاستىقتى نىعايتۋ ماسەلەلەرىن تالقىلادى.

رەسمي parlam.kz سايتىنىڭ مالىمەتىنشە، رادەك ۆوندراچەك قازاقستان مەن چەحيا اراسىنداعى بايلانىستىڭ دەڭگەيىن جوعارى باعالاعان. ءوز كەزەگىندە نۇرلان نىعماتۋلين چەحيا پارلامەنتى دەپۋتاتتار پالاتاسى سپيكەرىنىڭ ساپارى ۇزاق مەرزىمدى جانە ءوزارا ءتيىمدى ىنتىماقتاستىقتى جان-جاقتى تەرەڭدەتۋگە ماڭىزدى سەرپىن بەرەتىنىنە سەنىم ءبىلدىردى.

چەحيا ورتالىق جانە شىعىس ەۋروپا ەلدەرىنىڭ اراسىنداعى قازاقستاننىڭ نەگىزگى ساياسي جانە ەكونوميكالىق سەرىكتەستەرىنىڭ ءبىرى بولىپ تابىلاتىنىن ايتقان نۇرلان نىعماتۋلين قازاقستان باسشىلىعى چەحيا ەلىمەن قارىم-قاتىناستى تەرەڭدەتۋگە ەرەكشە ءمان بەرەتىنىن اتاپ ءوتتى. ءماجىلىس توراعاسىنىڭ پىكىرىنشە، ەكىجاقتى ىنتىماقتاستىقتى دامىتۋعا دەنساۋلىق ساقتاۋ، ماشينا جاساۋ، اگروونەركاسىپتىك تەحنولوگيالار، «جاسىل» ەنەرگەتيكا سياقتى الەۋەتتى سالالاردىڭ ماڭىزى زور. ەكىجاقتى قاتىناستاردىڭ ماڭىزدى قۇرامداس بولىگى رەتىندە پارلامەنتارالىق ىنتىماقتاستىق تۋرالى ايتقان ءماجىلىس توراعاسى ءتيىستى كوميتەتتەر مەن ىنتىماقتاستىق توپتارىنىڭ بىرلەسكەن جۇمىسى زاڭنامالىق تاجىريبە الماسۋعا، ەڭ الدىمەن الەۋمەتتىك ساياسات جانە ءبىلىم، سونداي-اق ەكونوميكانىڭ يننوۆاتسيالىق دامۋى مەن تسيفرلاندىرىلۋىنا مۇمكىندىك بەرەتىنىنە توقتالدى.

"The Qazaq Times"