فوتو: Reuters

مىسىردا پرەزيدەنتى ابدۋل فاتاح ءال-سيسي سولتۇستىك سينايداعى جۇما نامازى كەزىندە مۇسىلماندارعا جاسالعان شابۋىلعا كىنالىلەردىڭ جازاسىن تارتقىزۋعا ۋادە بەردى. بير ءال ابەد قالاسىندا ورنالاسقان ءال-راۆدا مەشىتىن تەررورشىلار بومبىلاپ، سىرتقا قاشقان مۇسىلمانداردىڭ ۇستىنەن وق جاۋدىرعان. ناتيجەسىندە، 300 بەيبىت تۇرعىن قازا تاپتى. بۇل تۋرالى ۆۆس اقپاراتتىق اگەنتتىگى جازدى. 

مىسىردى ءدۇر سىلكىندىرگەن تەرراكتىنى ءالى بىردە ءبىر لاڭكەستىك ۇيىم مەن ەكسترەميستىك توپ موينىنا العان جوق. ەگيپەتتىڭ بىرنەشە جىلدان بەرى سيناي جارتى ارالىنداعى يسلام توپتارىمەن كۇرەسىپ كەلە جاتقانى بەلگىلى. سونىمەن قاتار "يسلام مەملەكەتى" لاڭكەستىك ۇيىمى بۇل وڭىردە حريستيان شىركەۋلەرى مەن قوعامدىق ورىنداردا جارىلىستاردى ءجيى ۇيىمداستىرىپ كەلگەن بولاتىن.

تەررورشىلار مەشىتتى قورشاپ، عيماراتتى بومبىلاعاننان كەيىن، سىرتقا جان ساۋعالاپ شىققان تۇرعىنداردى بىرىنەن سوڭ ءبىرىن اتقان. قازا تاپقان ازاماتتاردىڭ قاتارىندا 30 ءبۇلدىرشىن دە بار. سونداي-اق، جۇزگە جۋىق ادامنىڭ اۋىر جاراقاتپەن اۋرۋحاناعا جەتكىزىلگەنى تۋرالى حابار تارادى.

ەگيپەتتە بولعان قايعىلى وقيعاعا بايلانىستى ءۇش كۇن ازا تۇتۋ ۋاقىتى بولىپ جاريالاندى. مىسىردىڭ پرەزيدەنتى ابدۋل فاتاح ءال-سيسي "بۇل ءبىزدىڭ تەرروريزمگە قارسى كۇرەسىمىزدى توقتاتۋ ءۇشىن جاسالعان شارا. ەگيپەت اسكەرى تەرراكتىگە جاۋاپ بەرۋ ءۇشىن قولىنان كەلگەننىڭ ءبارىن جاسايدى", - دەدى. جۇما كۇنى تەرروريستەردىڭ قارۋ-جاراقتارى ورنالاستىرىلعان ورىندارى اسكەري اۋە كۇشتەرىمەن بومبىلاندى.

“The Qazaq Times”