فوتو: inosmi.ru

اقش پرەزيدەنتى دونالد ترامپ سولتۇستىك كورەيانى "تەرروريزمدى قارجىلاندىرىپ وتىر" دەپ ايىپتاپ، ونى امەريكانىڭ يران مەن ءسۇريا باستاعان "تەرروريزممەن بايلانىسى بار مەملەكەتتەر" دەپ اتالاتىن قارا تىزىمگە قوستى. ال اقش-تىڭ مەملەكەتتىك حاتشىسى رەكس تيللەرسون سولتۇستىك كورەيامەن كەلىسسوزدەر جالعاساتىنى تۋرالى مالىمدەمەلەرىنەن باس تارتقان جوق. بۇل تۋرالى APF اقپاراتتىق اگەنتتىگى جازدى. 

دونالد ترامپ ءوز سوزىندە سولتۇستىك كورەياعا قارسى سانكتسيالار رەجيمىن ودان ءارى كۇشەيتۋ تۋرالى ۇسىنىس بىلدىرسە، امەريكانىڭ مەملەكەتتىك حاتشىسى ءالى دە ديپلوماتياعا يەك ارتادى. پرەزيدەنتپەن ويى ءبىر ارنادان شىقپاعان رەكس تيللەرسون باسپاسوزگە بەرگەن سۇحباتىندا وسىعان دەيىنگى "سولتۇستىك كورەيامەن اراداعى كۇردەلى قارىم-قاتىناستاردى كەلىسسوزدەر ارقىلى بەيبىت جولمەن قالپىنا كەلتىرەمىز" دەگەن ويىنان تانعان جوق.

رەكس تيللەرسون سانكتسيالار سولتۇستىك كورەيانىڭ ەكونوميكاسىنا ايتارلىقتاي شىعىن كەلتىرگەنىن اتاپ ءوتتى. سونداي-اق حاتشى قىتايدىڭ كحدر-داعى جالعىز مۇناي وڭدەۋشى زاۋىتىنا شيكىزات جىبەرۋىن دوعارماعانىنا قاراماستان، جالپى  ەكونوميكالىق شەكتەۋلەر لەگى ناتيجەلى بولىپ، پيوڭياڭعا ەداۋىر قىسىم كورسەتىلگەنىن جەتكىزدى.

دونالد ترامپتىڭ مالىمدەمەسىنە قاتىستى سولتۇستىك كورەيا تاراپىنان ءالى جاۋاپ بولعان جوق. دەگەنمەن اقش پرەزيدەنتىنىڭ "تەرروريزمدىڭ دەمەۋشىسى" دەگەن ايىپتاۋلارىنا دەيىن پيوڭياڭنىڭ مەملەكەتتىك باسىلىمى "رودوڭ سيمون" دونالد ترامپتى "اقىل-ەسى كەم اقشا جىمقىرۋشى شەنەۋنىككە" بالادى.

“The Qazaq Times”