قارجى مينيسترلىگى پاريجدەن ءزاۋلىم ءۇي العان قازاقستاندىق شەنەۋنىكتىڭ كىم ەكەنىن انىقتاماق

قر قارجى ءمينيسترى باقىت سۇلتانوۆ پاريج قالاسىنان 75,8 ملن دوللارعا ءزاۋلىم ءۇي ساتىپ العان قازاقستاندىق شەنەۋنىك تۋرالى تاراعان اقپاراتتاردى تەكسەرۋ جۇمىستارى ءجۇرىپ جاتقانىن مالىمدەدى، دەپ حابارلايدى كتك.

مينيستر بۇل جاڭالىقتى ەستىگەنىن ، بىراق پاريجدەن ءزاۋلىم ءۇي ساتىپ العان ادامنىڭ كىم ەكەنىن بىلمەيتىنىن اتاپ ءوتتى. وسىلايشا سۇلتانوۆ ۆەدومستۆو قىزمەتكەرلەرى كىرىس تۋرالى بارلىق دەكلاراتسيانى تەكسەرەدى دەپ سەندىردى.

ء"بىز دە بۇل جاڭالىق تۋرالى شەتەلدىك باسىلىمداردان جانە سىزدەردەن بىلدىك. الەمدە سالىق سالاسىنداعى اقپاراتتاردى الماسىپ وتىرۋ تۋرالى كەلىسىم بار. مەملەكەتتىك كىرىستەر كوميتەتىنىڭ رەاكتسياسى تۋرالى ايتار بولساق، كوميتەت دەكلاراتسيادا كورسەتىلگەندەي جىل سايىن شەتەلدەگى شوتتار مەن مۇلىكتەردى تەكسەرىپ وتىرادى. سوندىقتان دەكلاراتسيا بويىنشا ول پاتەردى كىم ساتىپ العانىن ىزدەستىرەتىن بولامىز", - دەدى ول.

ايتا كەتەيىك، بۇدان بۇرىن Mansion Global حالىقارالىق جىلجىمايتىن مۇلىك اگەنتتىگى قازاقستان ۇكىمەتىنىڭ رەسمي وكىلى پاريجدەن قۇنى  75, 8 ميلليون اقش دوللارى (65 ميلليون ەۋرو)  تۇراتىن ءزاۋلىم ءۇي ساتىپ العانى تۋرالى اقپارات تاراتقان. بۇل ءۇي وسى جىلعى ەڭ قىمباتقا باعالانعان ۇيلەردىڭ ءبىرى بولعان جانە ءپاريجدىڭ اتاقتى بايلار قونىستانعان Golden Triangle دەپ اتالاتىن اۋدانىندا ورنالاسقان.

“The Qazaq Times”