كامبودجادا وپپوزيتسيالىق پارتيانى تاراتۋ تۋرالى شەشىم قابىلدانباق

كامبودجادا بۇگىن جوعارعى سوت وپپوزيتسيالىق پارتيانى تاراتۋ تۋرالى ءىستىڭ سوڭعى نۇكتەسىن قويادى. ەل ۇكىمەتى Cambodia National Rescue Party (CNRP) - كامبودجانى قۇتقارۋ پارتياسىنا قارسى تۇسىرگەن شاعىمى ونىڭ جابىلۋىنا اكەلۋى مۇمكىن. پرەمەر-مينيستر حۋن سەننىڭ وپپوزيتسيالىق پارتيانىڭ ايىبىن راستايتىن جارلىق شىعاتىنى تۋرالى الدىن-الا مالىمدەمەسى ساراپشىلاردىڭ بۇل ارەكەتكە "سايلاۋ الدىنداعى باسەكەلەستەردى جولدان الىپ تاستاۋ شاراسى" دەگەن باعا بەرۋىنە ۇلاستى. 

ەل ۇكىمەتىن 32 جىلدان بەرى باسقارىپ كەلە جاتقان پرەمەردىڭ باستاماسىمەن وسىعان دەيىن 100-گە جۋىق شەنەۋنىكتەر قىتايمەن بىرلەسىپ، ەلدە رەۆوليۋتسيا جاساماق بولعان دەگەن ايىپپەن قىزمەتتەرىنەن 5 جىلعا دەيىن شەتتەتىلگەن بولاتىن. ەندى ولاردىڭ بىرقاتارى تۇتقىندالۋى مۇمكىن. CNRP پارتياسىنىڭ باسشىسى كەم سوحا اباقتىعا جابىلعاننان كەيىن، باس بوستاندىعىنان ايىرىلۋدان قاۋىپتەنگەن جيىرمادان استام ساياساتكەر ەلدەن كەتىپ قالعان.

كامبودجا ۇكىمەتى سايلاۋ ۇمىتكەرلەرى قاتارىنان شىعىپ قالعان پارتيالارعا بولىنەتىن رەسۋرستاردى قالعان كانديداتتار اراسىندا بولىسكە سالۋعا مۇمكىندىك بەرەتىن زاڭ جوباسىن دايىنداۋدى باستاپ كەتتى. Human Rights Watch ۇيىمى كامبودجاداعى دەموكراتيانىڭ ءولىم الدىندا تۇرعانىن ايتىپ، حۋن سەننىڭ مەملەكەتتى ءبىرپارتيالى جۇيەگە كوشىرۋ ارەكەتىن اشكەرەلەدى.

بۇگىن وتەتىن سوتتىڭ كوتەرىلىستەر مەن تارتىپسىزدىكتەرگە جول اشپاۋى ءۇشىن، ەلدەگى قاۋىپسىزدىك كۇشەيتىلدى. كامبودجادا جەمقورلىق ورىستەپ كەلە جاتقانىنا قاراماستان، بيلىك قۇرامىنىڭ وزگەرۋىنە جول بەرمەي وتىرعان حۋن سەن ءوزىن مەملەكەتتى ازاماتتىق سوعىستان قۇتقارىپ، بەيبىتشىلىك سىيلاعان تۇلعا سانايدى.

“The Qazaq Times”