يەمەن پرەزيدەنتى ەلىنە قايتسا، ومىرىنە قاۋىپ ءتونۋى مۇمكىن

يەمەن پرەزيدەنتى ساۋد ارابياسىنان ەلىنە قايتسا، ونىڭ ومىرىنە ۇلكەن قاۋىپ ءتونۋى مۇمكىن. وسىنداي مالىمدەمە جاساپ، مەملەكەت باسشىسىنىڭ ومىرىنە الاڭداۋشىلىق بىلدىرگەن يەمەننىڭ رەسمي وكىلى پرەزيدەنت ءابد-راببۋ مانسۇر ءحاديدىڭ ساۋد ارابياسىندا ءۇي قاماعىنا الىنعانى تۋرالى اقپاراتتى تەرىسكە شىعاردى. بۇل تۋرالى ءال-جازيرا اقپاراتتىق اگەنتتىگى جازدى. 

"ول (يەمەننىڭ پرەزيدەنتى) قالاسا، كەز كەلگەن ەلگە بارا الادى. بىراق قازىر ءحاديدىڭ يەمەنگە ورالۋى ونىڭ ءومىرى ءۇشىن اسا قاۋىپتى", - دەگەن رەسمي وكىل قانداي قارۋلى توپتىڭ پرەزيدەنتتى ولتىرگىسى كەلەتىنىن ناقتىلاعان جوق. جۋىردا اقپارات قۇرالدارى اقپان ايىنان  بەرى يەمەندە توبە كورسەتپەگەن مانسۇر حادي مەن ونىڭ وتباسىن ساۋد ارابياسى بيلىگى ءۇي قاماعىنا العان دەگەن حابار تاراتىپ ەدى. رەسمي وكىل بۇل باس بوستاندىعىنان ايىرۋ شاراسى ەمەستىگىن بىلاي ءتۇسىندىردى: "حادي يەمەنگە ورالۋ تۋرالى ويىن ايتقان كەزدە، ساۋد ارابياسى قازىر بۇل ساپار ونىڭ ءومىرى ءۇشىن قاۋىپتى بولاتىنىن ايتىپ، جاعداي تۇراقتالعانشا، ەر-ريادتا قالۋدى وتىنگەن".

ءابد-راببۋ مانسۇر حادي 2012 جىلدان بەرى يەمەننىڭ پرەزيدەنتى لاۋازىمىن اتقارىپ كەلەدى. ول وزىنە دەيىنگى ءالي ابدۋللا سالەحقا قارسى ءبىر جىلعا سوزىلعان كوتەرىلىس ناتيجەسىندە 2 مىڭعا جۋىق ادام قازا تاپقاننان كەيىن، اقش-تىڭ ارالاسۋىمەن ۋاقىتشا سايلانعان باسشى بولعان. بىراق ەكى جىل مەرزىمنەن كەيىن ول كەزەكتى سايلاۋدى كەيىنگە قالدىرا بەردى. سالەح تۇسىندا 18 جىل ۆيتسە-مينيستر بولعان مانسۇر حادي يەمەندىكتەر اراسىندا تانىمالدىعى تومەن بولدى. قازىر دە يەمەن ازاماتتارىنىڭ  اراسىندا قولداۋ تاپپاعان پرەزيدەنت تۋرالى جەرگىلىكتى تۇرعىنداردىڭ پىكىرىنە سايكەس، حالىقتىڭ باسىم كوپشىلىگى ونىڭ قايتا ورالماعانىن قالايدى.

“The Qazaq Times”