اقش پرەزيدەنتى بارلاۋ باسقارمالارىندا تاريحي قۇپيا قۇجاتتاردى جاريالاۋعا قول قويعاننان كەيىن، ورتالىق بارلاۋ باسقارماسى بىرقاتار قۇپيا قۇجاتتاردى كوپشىلىككە جاريا ەتتى. ورتالىق بارلاۋ باسقارماسىنىڭ ديرەكتورى مايك پومپەو وتكەن اپتادا 18 مىڭ دوكۋمەنت، 79 مىڭ اۋديو ماتەريال، 10 مىڭ ۆيدەو ماتەريال جاريالاعاندارىن مالىمدەدى. جاريا ەتىلگەن ماتەريالدار اراسىندا «ءال-كايدانىڭ» ليدەرى ۋساما بەن لادەننىڭ كومپيۋتەرىندە ساقتالعان ماتەريالدار دا بار. بۇل تۋرالى BBC ونلاين قىزمەتى حابارلادى.

2011 جىلى ۋساما بەن لادەن پاكىستاننىڭ اببودتاباد جەرىندە ارنايى قىزمەتكەرلەر جاعىنان ءولتىرىلدى. بۇل اقپاراتقا كۇمانمەن قاراعاندار دا كوپتەپ بولدى. الايدا، وسىدان كەيىن بەن لادەن الەم جۇرتشىلىعىنا كورىنگەن ەمەس. سول كەزدە اقپارات كوزدەرى وعان تاۋەلدى دەگەن كومپيۋتەردىڭ تابىلعانىن حابارلاعان ەدى. بۇل كومپيۋتەردەگى فايلدار بولەك-بولەك جاريا ەتىلىپ كەلەدى. ال بۇل جولى اقش ۇلتتىق مۇراعات سايتىنا جاريا ەتىلگەن ماتەريالدار بۇرىنعىلارىنان ءسال باسقاشا. ايتالىق، بين لادەننىڭ كۇندەلىكتەرى، وتباسىمەن تۇسكەن ۆيدەولارى، ۇلى حامزانىڭ ۇيلەنۋ تويىندا تۇسىرىلگەن ۆيدەو كەسكىندەر دە بار. ءتىپتى، مۋلتفيلمدەر مەن YouTube-تەن تۇسىرىلگەن روليكتەر دە بار.

حامزا بين لادەن. فوتو: BBC.

بۇل ۋساما بەن لادەننىڭ ماتەريالدارىن ءتورتىنشى رەت جاريالانۋى. اقش ۇلتتىق قاۋىپسىزدىگى جاعىنان جاريالاۋعا رۇقسات ەتپەگەن ءبىر ءبولىمى ءالى دە كوپشىلىك ءۇشىن قولجەتىمدى ەمەس. قازىرگە دەيىن ورتالىق بارلاۋ باسقارماسى بەن لادەننىڭ كومپيۋتەرىنەن 470 مىڭ فايلدى تاۋىپ شىققان. سولاردىڭ ءبىرى ۇلى حامزانىڭ ۇيلەنۋ تويىنىڭ ۆيدەو تاسپالارى. وعان تالداۋ جاساعاندا يراندا تۇسىرىلگەن بولۋى مۇمكىن دەگەن بولجام جاسالعان. وسىعان دەيىن حامزانىڭ تەك بالا كەزىندەگى ۆيدەولارى عانا جاريالانىپ كەلگەن.

ۆيدەو ءبىر ساعات شاماسىندا. وندا حامزا ساقال-مۇرتتى ءبىر توپ ادامنىڭ ورتاسىندا وتىرعانىن كورۋگە بولادى. بۇل كەسكىندە بين لادين تۇسپەگەن. الايدا، حامزانى كۇيەۋ بالام دەپ اتاعان ءبىر ادامنىڭ «بۇل قۋانىش باسقا مادجاحەدتەرگە دە تارالىپ جاتىر» دەگەن سوزدەرى بار. وعان قوسا ءسوز اراسىندا حامزانىڭ «ءال-كايداعا» مۇراگەر بولۋى مۇمكىن ەكەنىن ايتىسادى.

سوڭعى كەزدەرىندە تەررورلىق ۇيىم حامزانىڭ اقش-قا قاراتقان قورقىتۋ سوزدەرى بار اۋديو ماتەريالداردى تاراتقان. وندا ساۋد ارابياسىنىڭ ۇكىمەتىن قۇلاتۋ جانە سۇرياداعى جيھادشىلاردى قولداۋ تۋرالى ايتىلادى. دەگەنمەن، اقش ورتالىق بارلاۋ باسقارماسى ۇلتتىق قاۋىپسىزدىككە ساياتىن قۇپيا ماتەريالدار قاتارىندا حامزا جانە ونىڭ اكەسى تۋرالى ءالى دە كوپ قۇجاتتاردى تاراتپاي وتىر.

“The Qazaq Times”