ليۆان ساۋد ارابياسىنا سوعىس جاريالاۋشى مەملەكەت – دەپ مالىمدەدى رەسمي ەر-ريادتىڭ پارسى-اراب شىعاناعى ىستەرى ءمينيسترى سامەر ءال- سابحان.

ول جەرگىلىكتى «Al-Arabiya» تەلەارناسىنا بەرگەن سۇحباتىندا: «ءبىز ليۆان ەلىنە ساۋد ارابياسىنا سوعىس جاريالاۋشى مەملەكەت رەتىندە قارايتىن بولامىز. ءبىزدىڭ ليۆانعا بۇلاي قاراۋمىزدىڭ باستى سەبەبى حەزبوللا تەررورلىق ۇيىمى. اتالمىش ۇيىمنىڭ ساۋد ارابياسى اۋماعىندا بولعان بارلىق تەررورلىق شابۋىلدارعا قاتىسى بار. حەزبوللا ۇيىمى ەل جاستارىن لاڭكەستىك توپتارعا مۇشە بولۋعا يتەرمەلەۋدە. ليۆان بيلىگى وسى جاعدايلاردىڭ بارلىعىن ەسكەرۋى كەرەك جانە حەزبوللا ۇيىمىنا توسقاۋىل قويۋى ءتيىس» - دەگەن.

ەستەرىڭىزگە سالايىق، قاراشا ايىنىڭ 4-ءى كۇنى ليۆان پرەمەر-ءمينيسترى سااد حاريري ءوزىنىڭ وتستاۆكاعا كەتۋىن ءدال وسى ساۋد ارابيا استاناسى ەر-ريادتا مالىمدەگەن بولاتىن. ول ءوزىنىڭ قىزمەتتەن كەتۋىن ەلدەگى تۇراقسىزدىقپەن بايلانىستىرىپ، «حەزبوللا ۇيىمى مەن يران اراب الەمىندە بۇلىك جاساۋشىلار» دەگەن بولاتىن.

“The Qazaq Times”