فوتو: bnr.bg

كاتالونيانىڭ بۇرىنعى باسشىسى كارلەس پۋدجەمونت جانە ونىمەن بىرگە بەلگياعا قاشقان 4 ەكس-مينيستر تۇتقىندالدى. ولار سوتتىڭ الدىندا جاۋاپقا تارتىلعاننان كەيىن، بەلگيانىڭ شەكاراسىنان اسپاۋ تۋرالى قولحاتپەن قايتا بوساتىلدى. ەندى كەلەسى سوت وتىرىسى 15 كۇننەن كەيىن بولادى. سول كەزدە بەلگيا ۇكىمەتى كاتالونيانىڭ بۇرىنعى بيلىك وكىلدەرىن يسپانياعا ەكستراديتسيالاۋ نە ەلدە قالدىرۋ تۋرالى شەشىمدەرىن جاريالايدى.

وسىدان بۇرىن يسپانياداعى سوتتىڭ ادىلدىگىنە سەنبەگەن كارلەس پۋدجەمونت پەن ونىڭ جاقتاستارى بەلگياعا باس ساۋعالاپ كەلگەن بولاتىن. ولار وزدەرىن قورعاۋعا الۋ بويىنشا بريۋسسەلدىڭ زاڭگەرلەرى مەن بەلدى تۇلعالارىنىڭ كومەگىنە جۇگىنىپ كورگەن.

بارسەلونادا قولعا تۇسكەن جانە قۋادالاۋعا ۇشىعاران كاتالون باسشىلارىن بوساتۋدى تالاپ ەتكەن حالىق الاڭعا جينالدى. جەرگىلىكتى پوليتسيانىڭ دەرەگىنشە ۋنيۆەرسيتەت الاڭىنان 350 ادام توپتالىپ، ساياسي تۇتقىندار ءۇشىن بوستاندىق سۇراعان. ولار كارلەس پۋدجەمونت جازادان قاشىپ جۇرمەگەنىن، تەك ءادىل ۇكىم العىسى كەلەتىندىكتەن يسپانيانىڭ ەمەس، بەلگيانىڭ سوتىنا سەنىم ارتىپ وتىرعانىن ايتادى.

ساراپشىلاردىڭ ايتۋىنشا، ەگەر بريۋسسەل سوتى يسپانيادا كارلەس پۋدجەمونتتىڭ نەگىزگى قۇقىقتارى تاپتالۋى مۇمكىن دەگەن بولجام جاساسا، ونى ەلگە قايتارماۋى مۇمكىن. سوتتىڭ سوڭعى شەشىم شىعارعانعا دەيىن 60 كۇن ۋاقىتى بار.

“The Qazaq Times”