دونالد ترامپ: سولتۇستىك كورەيالىقتار - ۇلى ادامدار

دونالد ترامپ ءوزىنىڭ ازياعا ساپارى بارىسىندا ىسكەرلىك دۇيسەنبىسىن سولتۇستىك كورەيا ماسەلەسىنە جىلى قاباق تانىتۋدان باستادى. سوزىندە ادەتتەگىدەي "بىردە ءبىر ديكتاتور اقش-تىڭ كۇشىن باعالاماي، وپىق جەمەۋى كەرەك" دەپ ەسكەرتۋ جاساعان ول كحدر-مەن كەلىسسوزدەر جۇرگىزۋگە قارسى ەمەستىگىن ءبىلدىردى. بۇل تۋرالى APF اقپاراتتىق اگەنتتىگى جازدى. 

دونالد ترامپتىڭ ازياعا رەسمي ساپارى بارىسىندا  سولتۇستىك كورەيامەن اراداعى قايشىلىقتى قاتىناسى باستى تاقىرىپتاردىڭ ءبىرى بولاتىنى بەلگىلى. ويتكەنى سوڭعى كەزدە امەريكانىڭ وڭتۇستىك كورەيا جانە جاپونيامەن بىرلەسىپ جۇرگىزگەن اسكەري-جاتتىعۋلارى سولتۇستىك كورەيانىڭ تاعى ءبىر يادرولىق قارۋ سىناماسىن جاساۋعا يتەرمەلەۋى مۇمكىن.

دونالد ترامپ: "مەن كەز كەلگەن اداممەن ءبىر ۇستەل باسىنا وتىرا الامىن. ونى السىزدىك نە مىقتىلىق دەي المايمىن. مەن سولتۇستىك كورەيامەن كەلىسسوزدەرگە قارسى ەمەسپىن، بىراق ونى وتكىزۋگە ءالى ەرتە سياقتى", - دەدى.

اقش پرەزيدەنتى سونداي-اق ۇشاقتا جۋرناليستەرگە بەرگەن سۇحباتى بارىسىندا: "سولتۇستىك كورەيا ءبىزدىڭ ەلىمىز بەن بۇكىل الەم ءۇشىن وتە ۇلكەن ماسەلە جانە ءبىز ونى شەشكىمىز كەلەدى", - دەدى. ودان بولەك مەملەكەت باسشىسى سولتۇستىك كورەيا ازاماتتارىنا ءبىرىنشى رەت: "ولار وتە ەڭبەكقور جانە ۇلى ادامدار دەپ ويلايمىن. ولار الەم تانىعان كەيىپىنە قاراعاندا الدەقايدا مەيىرىمدى سياقتى", -دەپ ەرەكشە جىلى ءسوز ارنادى.

“The Qazaq Times”