بريۋسسەل كاتالونيا باسشىسىنا قورعان بولا الا ما؟

يسپانيا بيلىگى كاتالونيانىڭ (بۇرىنعى) باسشىسى كارلەس پۋدجەمونت پەن ونىڭ جانىنداعى تاعى 4 لاۋازىمدى تۇلعاعا ەۋروپالىق تۇتقىنداۋ وردەرىن جاريالادى. بەلگيادا جۇرگەن كاتالونيانىڭ "بەس" بەلسەندىسى اۆتونوميالىق ءوڭىردىڭ بيلىك وكىلدەرىنەن 9 ازامات تۇتقىندالعانى تۋرالى حاباردان كەيىن، مادريدتە وتكەن سوتقا كەلۋدەن باس تارتتى. بۇل تۋرالى ۆۆس اقپاراتتىق اگەنتتىگى جازدى. 

قولعا تۇسكەندەردىڭ ءبىرى 50 مىڭ ەۋرو كەپىلدەمە تولەپ، بوساتىلدى. قالعاندارىنىڭ بارىنە كاتالونيادا بەيبەرەكەتسىزدىك ورناتىپ، ورتالىق بيلىكتىڭ بۇيرىعىن ورىنداماعانى ءۇشىن ايىپ تاعىلىپ وتىر. ءوزىن ءالى دە وتكەن اپتادا جاريالانعان "كاتالون رەسپۋبليكاسىنىڭ" پرەزيدەنتى دەپ اتايتىن كارلەس پۋدجەمونت بريۋسسەل تەلەارناسىنا بەرگەن سۇحباتىندا يسپانياداعى سوتتىڭ ادىلدىگىنە سەنبەيىنشە، ول جاققا ورالمايتىنىن ايتتى. سونداي-اق كارلەس پۋدجەمونت كەلەسى ايدا وتەتىن ءوڭىر باسشىسىنىڭ  سايلاۋىنا قاتىسۋعا نيەتتى ەكەنىن ءبىلدىردى.

ەستەرىڭىزگە سالا كەتەيىك، يسپانيادان تاۋەلسىزدىك الۋ ماقساتىنداعى رەفەرەندۋم قورىتىندىسىنا سۇيەنىپ, ءوزىن دەربەس مەملەكەت دەپ جاريالاعان كاتالونياداعى بارلىق باسشىلار قىزمەتىنەن بوساتىلىپ، ورتالىق بيلىك جاڭا سايلاۋ وتكىزەتىنىن حابارلاعان بولاتىن.

كارلەس پۋدجەمونتپەن بىرگە يسپانيا بيلىگىنىڭ قىرىنا ىلىككەندەردىڭ قاتارىندا تومەندەگى ازاماتتار بار:

• Meritxell Serret  - اۋىل شارۋاشىلىق ءمينيسترى
• Antoni Comín - دەنساۋلىق ساقتاۋ ءمينيسترى
• Lluís Puig - بۇرىنعى مادەنيەت ءمينيسترى
• Clara Ponsatí - بۇرىنعى ءبىلىم ءمينيسترى

ەۋروپالىق تۇتقىنداۋ تۋرالى وردەر بريۋسسەلدەگى پروكۋرورلارعا جىبەرىلدى. ەندى ولار 24 ساعاتتىڭ ىشىندە وردەردى قاراپ، ونداعى شەشىمنىڭ دۇرىس نە بۇرىستىعى تۋرالى پىكىرىن ايتۋى كەرەك.

“The Qazaq Times”