فوتو: كازينفورم

قازاقستان دۇنيە جۇزىلىك بانكتىڭ Doing Business 2018 رەيتينگىندە ءبىر ساتىعا تومەندەپ، 36 ورىنعا ءتۇستى. 

وتكەن جىلى قازاقستان اتالعان رەيتينگتە 35 ورىندا بولعان. ال بيىل بۇل ورىنعا رەسەي ەلى يە بولىپ وتىر.

بانك بايانداماسىندا ايتىلعانداي، قازاقستان مينوريتارلى ينۆەستورلاردى قورعاۋ بويىنشا الەمدەگى كوشباسشى ەل بولعان. قازاقستان مۇنداي ناتيجەگە ءىرى كورپوراتيۆتىك شەشىمدەردى قابىلداۋدا اكتسيونەرلەردىڭ قۇقىقتارى مەن ءرولىن كۇشەيتۋ، كورپوراتيۆتىك اشىقتىقتى تالاپ ەتەتىن جانە سوت تالقىلاۋى كەزىندە كورپوراتيۆتىك اقپاراتقا قول جەتكىزۋدى قامتاماسىز ەتۋ ارقىلى جەتىپ وتىر.

بۇدان بولەك مەملەكەت كاسىپورىنداردى تىركەۋ، ەلەكتر جابدىقتارىنا قوسۋ، مۇلىكتى تىركەۋ جانە ورىندالعان كەلىسىمشارتتاردى قامتاماسىز ەتۋ تۋرالى ءوز پوزيتسيالارىن جاقسارتقان.

"كرەديت الۋ" جانە "حالىقارالىق ساۋدا" كورسەتكىشى بويىنشا رەسپۋبليكا بۇرىنعى ورىندا تۇر. ال "قۇرىلىسقا رۇقسات الۋ", "سالىق", "تولەم قابىلەتىنىڭ ناشار بولۋى بويىنشا رۇقسات بەرۋ" كورسەتكىشى تومەندەگەن.

“The Qazaq Times”