ترامپتىڭ كەزدەسۋ تالابىنان يران پرەزيدەنتى باس تارتقان

اقش-تىڭ ورتا شىعىستاعى بەلسەندىلىگى دونالد ترامپ تۇسىندا السىرەپ تۇرعانى انىق. يران يادرولىق كەلىسىمى تۋرالى جاڭا داۋ ترامپ ۇكىمەتى مەن ەۋروپانىڭ دا پىكىرىن ەكى ارناعا سالدى. يران ماسەلەسىندە ۋاشينگتون بيلىگى ءوز دەگەنىن تولىق جۇزەگە اسىرا الماي كەلەدى.

جاقىندا عانا يران ءسىم وكىلى باحرام حاسمي مالىمدەمە جاساپ، وتكەن ايداعى بۇۇ جوعارى كەڭەسى كەزىندە ترامپ يران پرەزيدەنتى حاسان رۋحانيمەن كەزدەسىپ پىكىرلەسۋدى تالاپ ەتكەنىن مالىمدەدى. بۇل سول كەزدە اقپارات قۇرالدارىنان قۇپيا ۇستالعان. دەگەنمەن، رۋحاني بۇل ۇسىنىسقا تويتارىس بەرگەن. بۇل تۋرالى بۇگىن «شينحۋا» اگەنتتىگىنىڭ رەسمي سايتى جازدى.

حاسمي سوزىندە: «اقش تارابى ەكى جاقتى كەلىسسوز جۇرگىزۋ تالابىن قويعان ەدى. بىراق، پرەزيدەنت رۋحاني بۇدان باس تارتتى»، – دەدى. وسىلايشا، ترامپ پەن رۋحاني بۇۇ باس اسسامبلەياسىندا كەزدەسكەن جوق. 13 قازان كۇنى ۋاشينگتون تارابى يرانعا قاراتقان جاڭا ساياساتىن جاريا ەتتى. بۇل اقش ۇكىمەتىنىڭ يراننىڭ ساياسي ۇستانىمىن شەكتەۋ ءۇشىن جاساعان جاڭا باعىتى دەۋگە بولادى. وندا يراننىڭ يادرولىق ماسەلەسى بويىنشا التى جاقتى كەلىسىمدى بۇتىندەي تەرىستەمەگەنىمەن، «يسلام رەۆوليۋتسيالىق گۆاردياسىنا» قارسى سانكتسيالاردى قامتيتىن ناقتى شارالار كەشەنىن ۇسىندى. بۇل پارلامەنتتە قارالىپ، جاڭا زاڭ ەرەجەمەن بەكىتىلدى.

بۇل شارادان كەيىن رۋحاني پىكىر ءبىلدىرىپ: «يران يادرولىق كەلىسىمى – حالىقارالىق كەلىسىم. سوندىقتان ونى اقش-تىڭ بىرجاقتى وزگەرتۋىنە دە، جوققا شىعارۋىنا دا قۇقىعى جوق»، – دەگەن. ول تاعى: «يران كەلىسىمىنە قۇرمەت ەتىپ، يران مۇددەسى قاراستىرىلماعان سوڭ دا،  ءبىز كۇتكەن جاۋابىن بەرە المايمىز» دەگەن بولاتىن. بۇل ساياسي جاۋاپتاسۋلار يران مەن قۇراما شتات اراسىنداعى قاتىناستى بارعان سايىن سالقىنداتىپ وتىر.

“The Qazaq Times”