شي جينپيڭ مەن جياڭ زىمين. فوتو: The Economic Times.

قىتاي كوممۋنيستىك پارتياسى شي ءجينپيڭنىڭ (سي تسزينپين) ستاتۋسىن ماۋ زىدوڭنىڭ (ماو زەدۋن) دەڭگەيىنە كوتەردى. قۇرىلتايدىڭ جابىلۋىندا پارتيا ليدەرلەرى كونستيتۋتسيانى وزگەرتىپ، «شي ءجينپيڭنىڭ قىتاي بىرەگەيلىگىنە ساي جاڭاشا سوتسياليزم تۋرالى يدەياسى» دەگەن ۇراندى پارتيا جارعىسىنا قوستى. بۇل تۋرالى سول ەلدىڭ «People» جانە «شينحۋا» سىندى رەسمي اقپارات كوزدەرى مالىمدەدى.

پارتيا جارعىسىندا وسىعان دەيىن كوممۋنيستىك قىتاي بيلىگىنىڭ العاشقى توراعاسى ماۋ زىدوڭ مەن 80-ءشى جىلدارداعى رەفورماتور دىڭ ءشياۋپيڭنىڭ اتى عانا اتالىپ كەلگەن. ساراپشىلاردىڭ پىكىرىنە سەنسەك، بۇل قىتايداعى جاڭا ءداۋىردىڭ باستالعاندىعىن بىلدىرەدى ەكەن. بۇل دەگەنىمىز شي جينپيڭگە قارسى ءسوز ايتۋ - پارتيا ۋستاۆى مەن جارعىسىنا قارسى شىققانمەن بىردەي دەگەندى بىلدىرەدى. ول 2012 جىلدان بەرى بيلىكتەگى ىقپالىن تولاسسىز ارتتىرىپ كەلە جاتقان بولاتىن. ال، قىتاي ۇكىمەتىنىڭ كوز الداعى ماقساتى ەل ىشىندەگى بەكەمدىلىكتى ساقتاپ، شەتەلدەردەگى ىقپالىن كەڭەيتە ءتۇسۋ.

قۇرىلتايدىڭ اشىلۋ سالتاناتى كەزىندە شي جينپيڭ ءوزىنىڭ «قىتاي ەرەكشەلىگىنە يە جاڭاشا سوتسياليزم قۇرۋ تۋرالى ويلارىن» ءۇش ساعاتقا سوزىلعان بايانداماسىندا تانىستىرىپ وتكەن ەدى. وسىدان كەيىن بۇل «شي جينپيڭ يدەياسى» دەپ اتالىپ، وقۋشى-ستۋدەنتتەر، جۇمىسشىلار، مەملەكەتتىك قىزمەتكەرلەر جانە قكپ-نىڭ 90 ملن مۇشەسىنىڭ ۇيرەنۋىنە تۋرا كەلەدى.

شي ءجينپيڭنىڭ ەسىمى پارتيا جارعىسىنا ەنۋى ونىڭ بارلىق ساياسي قارسىلاستارىن جوق ەتۋمەن بىردەي. وعان ەندىگى جەردە ەل ىشىندە ەشبىر قارسى ءسوز ايتىلمايدى. 2 مىڭعا جۋىق دەلەگات قاتىسقان قۇرىلتايدىڭ سوڭعى كۇندەرىندە ورتالىق كوميتەتىڭ جاڭا قۇرامى بەلگىلى بولماق. ال بۇگىن قىتايدىڭ ەڭ جوعارى ساياسي بيۋروسىنىڭ مۇشەلەرىنىڭ ەسىمى جاريالانادى. بۇل ەسىمدەردىڭ اراسىندا بولاشاق شي ءجينپيڭنىڭ مۇراگەرى دە بار. بىراق قازىر مۇراگەردىڭ كىم بولاتىنى انىق ەمەس.

“The Qazaq Times”