فوتو: Kursiv.kz

قازاقستاندا بەنزين باعاسى رەسەيدەن يمپورتتالاتىن بەنزين كولەمىنە بايلانىستى رەتتەلۋى مۇمكىن. بۇل تۋرالى "قازمۇنايگاز ونىمدەرى" كومپانياسىنىڭ دامىتۋ جونىندەگى باسقارما ديرەكتورى باقىتجان تاسانباەۆ مالىمدەدى.

ونىڭ سوزىنشە، قازىردىڭ وزىندە "قازمۇنايگاز" جانار-جاعارماي بەكەتتەرىندە اي-92 ماركالى بەنزيننىڭ ءليترى 157 تەڭگەدەن ساتىلىپ جاتىر.

"باعانى رەتتەۋ قازاقستاندىق جانە رەسەيلىك ونىمدەردىڭ ناقتى كولەمىنە  بايلانىستى بولۋى مۇمكىن. باعا قازاقستاندىق جانە رەسەيلىك باعالارعا، سونداي-اق ولاردىڭ جەتكىزۋ بالانسىنا تاۋەلدى. باعانىڭ شارىقتاۋ شەگىن مەن ناقتى ايتا المايمىن، بىراق تىم "اسپانداپ" كەتپەيدى دەپ ويلايمىن. قىسقا مەرزىمدە باعا ءوسىمى بولادى", - دەدى ول.

سونداي-اق، تاسانباەۆ اي-92 ماركالى بەنزيننىڭ باعاسى وسى اپتادا تۇراقتالاتىنىن اتاپ ءوتتى.

"استانادا ءونىم ەركىن ساتىلىپ جاتىر. اي-92 ماركالى بەنزيننەن 2 مىڭ تونناداي قور بار. رەسەيدەن 2 مىڭ توننا كولەمىندە بەنزين يمپورتتالدى، تاعى 800 تونناسى جولدا. ال جالپى قازاقستانعا كەلەر بولساق، 20 مىڭ توننا اي-92 ماركالى بەنزين جولدا كەلەدى. قازىرگى ۋاقىتتا زاۋىتتاردىڭ بىرەۋى جوندەۋدەن ءوتىپ جاتقانىن ەسكەرسەك جانە يمپورت قاجەت بولعاندىقتان 45 مىڭ توننا رەسەيلىك بەنزيندى اكەلۋگە كەلىسىمشارت جاساستىق، ونى جەتكىزۋ وسى اپتادا جۇزەگە اسادى", - دەدى تاسانباەۆ.

“The Qazaq Times”