يرانداعى نارازىلىق شاراسى. فوتو: VOA.

يراننىڭ رۋحاني كوسەمى اياتوللا حامەنەي جانارماي باعاسىن 50 پايىزعا كوتەرۋ تۋرالى ۇكىمەتتىڭ شەشىمىن قولدادى. بۇل شەشىم دەمالىس كۇندەرى اۋقىمدى نارازىلىق شاراسىنا تۇرتكى بولدى. ەلدىڭ رۋحاني كوسەمى نارازىلىق شاراسىن «ارانداتۋشىلار» ۇيىمداستىرعان دەپ ايىپتاعان.

حامەنەيدىڭ مالىمدەمەسىنەن كەيىن، تەھران بيلىگى نارازىلىقتى باسۋ ءۇشىن ەلدىڭ عالامتورىن جاۋىپ تاستادى. اياتوللا حامەنەي «دۇربەلەڭ» كەزىندە بىرنەشە ادامنىڭ قازا بولعانىن ايتتى، بىراق ناقتى مالىمەت بەرمەگەن. ول جانە قاۋىپسىزدىك كۇشتەرىنە بۇيرىقتى ورىنداۋعا تاپسىرما بەرگەن.

ەلدەگى نارازىلىققا بيلىك تارابى تارتىپسىزدىك جانە ارانداتۋشىلىق دەگەن باعا بەرىپ وتىر. بۇعان قوسا يراننىڭ بارلاۋ ورگانى مالىمدەمە جاساپ: «سوڭعى ەكى كۇندەگى تارتىپسىزدىككە كىنالى ادامدار تابىلدى جانە ءتيىستى جازاعا تارتىلدى»، –دەگەن. بۇعان قاراپ، كەيبىر ساراپشىلار يران رەسمي تارابىنىڭ بۇل مالىمدەمەلەرى نارازى جۇرتتى جاپپاي قىرىپ-جويۋ ارەكەتتەرىنەن دەرەك بەرەدى دەپ قارايدى.

يسلام رەسپۋبليكاسىنىڭ رەسمي اقپارات اگەنتتىكتەرى ەرەۋىلشىلەر ءبىر پوليتسيانى ولتىرگەنىن ايتسا، جارتىلاي رەسمي اقپارات اگەنتتىگى سانالاتىن ParsToday مىڭنان استام بەلسەندىنىڭ قاماۋعا الىنعانىن جازدى.

يرانداعى نارازىلىق اكتسياسىنا جانە وعان قاراتا ۇكىمەتتىڭ رەاكتسياسىنا امەريكا قۇراما شتاتتارى نازار اۋدارىپ وتىرعانىن ءبىلدىردى. ترامپ تەھراننىڭ نارازىلىق شاراسىنا قاراتقان پوزيتسياسىن سىنعا الدى. اق ءۇي ءوز مالىمدەمەسىندە: «تەھران زىمىران جانە يادرولىق باعدارلامالاردى ىنتالاندىرۋدا. ولار يراندى تەرروريزمدى قولدايتىن جانە سول ءتۇزىمىن ماقتان ەتەتىن ەلگە ايلاندىرىپ وتىر. ناتيجەسى بيلەۋشى تاپتىڭ حالىقتى تاستاپ، جەكەلەگەن بايلىق پەن بيلىك ءۇشىن كۇرەسۋدىڭ قانداي بولاتىنىن كورسەتىپ وتىر»، – دەگەن.

يران ۇكىمەتىنىڭ جانارماي قۇنىن كوتەرۋ تۋرالى شەشىمى يراننىڭ وننان استام قالاسىندا نارازىلىق شەرۋىنە سەبەپ بولعان.

“The Qazaq Times”