ۇلىبريتانيا بالالاردى جىنىسىنا قاراي ءبولىپ وقىتۋعا قارسى

ۇلىبريتانيانىڭ سوتى قىزدار مەن ۇل بالالاردى ءبولىپ وقىتاتىن يسلام مەكتەبىنىڭ جۇمىسىن زاڭسىز دەپ تاپتى. ۇلىبريتانيانىڭ ورتالىق بولىگىندە، بيرمينگامدا ورنالاسقان  Al-Hijrah مەكتەبىنە وقۋشىلاردى جاڭاشىل قوعامعا دايىنداي الماي وتىر دەگەن ايىپ تاعىلدى. بۇل تۋرالى APF اقپاراتتىق اگەنتتىگى جازدى. 

سوت بالالاردى ءبولىپ وقىتۋدى ديسكريميناتسيانىڭ ءبىر ءتۇرى دەپ باعالاپ، 2010 جىلى قابىلدانعان تەڭدىك تۋرالى زاڭعا قايشى كەلەدى دەگەن شەشىم شىعاردى. ەندى وقۋشىلاردى جىنىسىنا قاراي ءبولىپ وقىتۋ ساياساتىن ۇستاناتىن مەكتەپتەر زاڭعا باعىنىپ، ءبىلىم بەرۋ جۇيەسىن وزگەرتپەسە، جاۋاپكەرشىلىككە تارتىلۋى مۇمكىن. اتالعان شەشىم جوعارىدا اتالعان مەكتەپتەن بولەك، تاعى 20 ءبىلىم ورداسىنا اسەر ەتۋى مۇمكىن.

قىزدار مەن ۇل بالالاردى ءبولىپ وقىتاتىن مەكتەپتەردە ولار ساباقتى جەكە سىنىپتاردا وقيدى. ساباقتان تىس ۋاقىتتاردا دا ءبىر-ءبىرىن كەزدەستىرمەيدى. ويتكەنى وينايتىن الاڭشالار، سپورتتىق زالدار، كىتاپحانا، دالىزدەرگە دەيىن جەكە سالىنعان.

“The Qazaq Times”