ساۋد ارابياسىنىڭ كورولى. فوتو: ينوسمي.

Cاۋد ارابياسىنىڭ «اراب جاڭالىقتار قىزمەتى» اگەنتتىگى ەلدىڭ كورولى سالمان العاش رەت رەسەيگە رەسمي ساپارمەن باراتىنىن حابارلاعان. ول ۇكىمەت باسشىلارى جانە جەكە سەكتور وكىلدەرىنىڭ جوعارى دەڭگەيدەگى دەلەگاتسياسىن باستاپ بارعالى وتىر. وسىلايشا سالمان يبن ابدۋل-ازيز ءال-ساۋد رەسەي فەدەراتسياسىنا باراتىن العاشقى ساۋد ارابياسىنىڭ  پاتشاسى بولماق. بۇل تۋرالى «شينحۋا» اگەنتتىگىنىڭ رەسمي سايتى جازدى.

رەسەي ۇكىمەتىنىڭ ءباسپاسوز حاتشىسى دميتري پەسكوۆ بۇقارالىق اقپارات قۇرالدارىنا اتالعان ساپارعا دايىندىق جۇمىستارىنىڭ سوڭعى كەزەڭگە وتكەنىن ايتتى. ول سوزىندە: «اراب الەمى باسشىلارىنىڭ ءبىرى رەتىندە، كورول سالمان اراب ەلدەرى اراسىنداعى ماڭىزدى تۇلعالاردىڭ ءبىرى. ءبىز بۇل ساپار ەكىجاقتى قارىم-قاتىناستاردى دامىتۋعا جاڭا سەرپىن بەرەدى دەپ ۇمىتتەنەمىز. ءارى ەكى ەل قارىم-قاتىناسىن ءتىپتى دە جاقسارتا تۇسەدى»، - دەدى.

كرەمل شەنەۋنىكتەرىنىڭ ايتۋىنشا رەسەي ساۋد ارابياسىمەن ديالوگتى ساقتاپ تۇرۋعا بارىنشا مۇددەلى كورىنەدى. كەزەكتى كەزدەسۋ كەزىندە ورتا-شىعىس ماسەلەسى، اسىرەسە ءسۇريا ءىسى تالقىلانادى دەپ وتىر. ساۋد ارابياسى كوپتەن بەرى سيريا وپپوزيتسياسىن قولداپ، باشار اسادتىڭ بيلىكتەن كەتۋىن تالاپ ەتىپ كەلگەن ەدى. بۇل جاعىنان ساۋد ارابياسى مەن رەسەيدىڭ مايدانى ءبىر ەمەس. الداعى تالقىدان كەيىن وزگەرىستەر بولادى دەپ كۇتىلۋدە. رەسەي «سپۋتنيك» اقپارات اگەنتتىگىنىڭ حابارىنا سۇيەنسەك، سالماننىڭ رەسەيگە ساپارى 5 قازان كۇنى بولمادى.

“The Qazaq Times”