تاليبان قوزعالىسى اقش قورعانىس ءمينيسترى دجەيمس مەتتيس پەن ناتو باس حاتشىسى يەنس ستولەنبەرگتىڭ ۇشاقتارى قونعان اۋەجايدى مينومەتپەن اتقىلادى – دەپ حابارلايدى Tolo تەلەارناسى.

Tolo ارناسىنىڭ مالىمەتىنشە، تاليبان قوزعالىسى سودىرلارى اۋعانستان استاناسى كابۋل قالاسىنىڭ اۋەجايىنا اقش قورعانىس ءمينيسترى دجەيمس مەتتيس پەن ناتو باسشىسى يەنس ستولەنبەرگتىڭ ۇشاقتارى قونعاننان كەيىن ءبىر ساعاتتان سوڭ مينومەتپەن وق جاۋدىرعان. مەتتيس پەن ستولەنبەرگتىڭ كابۋلعا جاساعان بۇل جولعى ءىس-ساپارى رەسمي ەش جەردە جاريالانباعان. بىراق تاليبان سودىرلارى ءدال وسى كۇنى كابۋل اۋەجايىن اتقىلاعان.

اۋعانستان ىشكى ىستەر ءمينيسترى نادجيب ءدانيشتىڭ سوزىنشە، سودىرلار اۋەجايعا قاراتا 20-دان استام زىمىران اتقان. جارىلىستان اۋەجاي قىزمەتكەرلەرى مەن قاراپايىم جولاۋشىلار زارداپ شەكپەگەن. تەك ۇشاقتاردىڭ قونۋ جولاعى قيراتىلعان. تاليبان قوزعالىسىنىڭ اۋەجايعا جاساعان زىمىران شابۋىلى كەزىندە دجەيمس مەتتيس پەن يەنس ستولەنبەرگ اۋعانستان پرەزيدەنتى اشراف گانيدىڭ قابىلداۋىندا بولعان.

“The Qazaq Times”