فوتو: ic24.kz

قازاقستانداعى ۇلتتىق كومپانيالار وسى جىلدىڭ ەكىنشى توقسانىندا قاڭتار -ناۋرىز ايىنداعىداي جوعارى تابىسقا جەتە المادى. بۇل تۋرالى Finprom.kz ساراپتاما اگەنتتىگىنىڭ زەرتتەۋىندە ايتىلعان. 

2017 جىلدىڭ ەكىنشى توقسانىندا ۇلتتىق كومپانيالاردىڭ قىزمەت كورسەتۋ جانە تاۋار ءوندىرىسى بويىنشا تابىسى 40,9 پايىزدان 13,8 پايىزعا دەيىن تومەندەپ كەتكەن. وسى جىلدىڭ ءساۋىر-ماۋسىم ايىنداعى كورسەتكىش بىلتىرعى جىلمەن سالىستىرعاندا دا تومەن بولىپ وتىر - 2016 جىلدىڭ ەكىنشى توقسانىندا ۇلتتىق كومپانيالاردىڭ تابىسى 22,2 پايىز دەڭگەيىندە بولعان.

ءتىپتى بيىلعى جىلدىڭ ەكىنشى توقسانىندا تابىس پروفيلىندەگى  شىعىندار قىسىمى ساتىلعان تاۋارلار مەن كورسەتىلەتىن قىزمەتتەر قۇنىنان دا جوعارى بولعان - شىعىن 2017 جىلدىڭ ءبىرىنشى توقسانىمەن سالىستىرعاندا 18,2 پايىزعا جانە وتكەن جىلدىڭ ەكىنشى توقسانىمەن سالىستىرعاندا 8,6 پايىز عا ارتتى.

كىرىسكە قاراعاندا شىعىننىڭ كوپ بولۋى ۇلتتىق كومپانيالاردىڭ تابىس دەڭگەيىنىڭ تومەندەۋىنىڭ باستى سەبەبى بولىپ وتىر

سونىمەن وسى جىلدىڭ ەكىنشى توقسانىندا ۇلتتىق كومپانيالار كىرىسىنىڭ جالپى كولەمى 555,3 ملرد تەڭگەگە جەتكەن - بۇل 2016 جىلدىڭ ءساۋىر-ماۋسىم ايىنداعى كىرىس كورسەتكىشىنەن بار بولعانى 3,7 پايىزعا ارتىق. ال شىعىنى 488,1 ملرد تەڭگە كولەمىندە ناقتىلاندى جانە بۇل وتكەن جىلدىڭ ەكىنشى توقسانىنا قاراعاندا 11,3 پايىزعا ارتىق بولىپ وتىر.

 

ايتا كەتەيىك، سوڭعى كەزدەرى قازاقستان ەكونوميكاسى ءۇشىن ۇلتتىق كومپانيالاردىڭ ءتيىمسىز ەكەنى بايقالىپ كەلەدى. ويتكەنى مەملەكەت قارىزىنىڭ ءبىراز بولىگى وسى كومپانيالارعا تيەسىلى. وسىعان بايلانىستى قازىرگى كەزدە قازاقستاندا ءىرى ۇلتتىق كومپانيالاردى جەكەشەلەندىرۋ جۇمىستارى ءجۇرىپ جاتىر. قر ۇلتتىق ەكونوميكا مينيسترلىگىنىڭ مالىمەتىنشە، وسىنداي رەسپۋبليكالىق مەنشىكتى جەكەشەلەندىرۋدەن جانە ۇلتتىق باسقارۋ حولدينگتەرىنىڭ قۇرامىنا كىرەتىن اكتيۆتەردى ساتۋدان 4-7 ملرد دوللار شاماسىندا تابىس ءتۇسۋى مۇمكىن.

 “The Qazaq Times”