اقش-سولتۇستىك كورەيا شيەلەنىسى كۇشەيىپ تۇرعان ۋاقىتتا تيللەرسون قىتايعا بارماق

اقش-تىڭ مەملەكەتتىك حاتشىسى رەكس تيللەرسون ەرتەڭ، 28 قىركۇيەك بەيسەنبى كۇنى، قىتاي استاناسى بەيجىڭگە ساپارلاي كەلەدى. بۇل تۋرالى “The Wall Street Journal” باسىلىمى حابارلادى.

بۇل ۋاقىتتا اقش ۇكىمەتىنىڭ قىتاي ارقىلى سولتۇستىك كورەيانىڭ يادرولىق باعدارلاماسىنا قىسىم جاساۋى ۇزدىكسىز جالعاسۋدا. پيوڭياڭ (پحەنيان) مەن ۋاشينگتون اراسىنداعى تارتىستا تولاس تاپقان جوق.

اقش مەملەكەتتىك دەپارتامەنتىنىڭ وكىلى حەزەر ناۋەرت مالىمەتىندە، مەملەكەتتىك حاتشى رەكس تيللەسوننىڭ قىتايعا ساپارى، الداعى ۋاقىتتاعى پرەزيدەنت ترامپتىڭ ساپارىنا جول اشادى دەلىنگەن. سونىمەن بىرگە تيللەرسون ساپارى قىتايدىڭ قازىرگى اقش ساياساتىندا ماڭىزدىلىعىن ايگىلەيدى دەيدى ساراپشىلار.

ايتا كەتەيىك، كەشە اقش قازىنا دەپارتامەنتى سولتۇستىك كورەيانىڭ سەگىز بانكتەرىن جانە سول ەلدىڭ  قارجىلىق جۇيەسىمەن بايلانىستاعى 26 ادامدى سانكتسيا تىزىمىنە كىرگىزگەنىن جاريا ەتتى. بۇل تىيىم سالىنعان يادرولىق جانە زىمىراندىق جوبالاردى قارجىلاندىرۋعا قاراجات جۇمساعانى ءۇشىن سولتۇستىك كورەيا بانكتەرىنەن كاپيتالدىڭ اعىمىن شەكتەۋ شاراسى بولىپ تابىلادى.

اتالعان دەپارتامەنتتىڭ حابارىندا، بۇل بانكتەر مەن جەكە تۇلعالار نەگىزىنەن سولتۇستىك كورەيا ازاماتتارى بولىپ، قىتاي، رەسەي، ليۆيا جانە ءباا قاتارلى ەلدەردە جۇمىس ىستەيتىنى تۋرالى مالىمەت بەرگەن. سونىمەن بىرگە بۇل شەكتەۋ، سولتۇستىك كورەيالىق بانكتەر مەن قارجى اگەنتتەرىنە قارسى سانكتسيالار بولىپ تابىلادى دەلىنگەن.

“The Qazaq Times”