اقش پەن يراننىڭ جاڭا قايشىلىعى ءوڭىر تىنىشتىعىنان قاتەر توندىرۋدە

يراننىڭ پرەزيدەنتى حاسان رۋحاني وتكەن اپتانىڭ سوڭىندا حابارلاما تاراتىپ، يران بالليستيكالىق زىمىران باعدارلامالارى مەن باسقا مۇمكىندىكتەردى دامىتۋدى جالعاستىرا بەرەتىنىن ايتتى. بۇل يران جاقتىڭ اقش تارابىنان ايتىلعان سىن-پىكىرلەردى ەلەمەگەنىن، سونىمەن بىرگە ەكى ەل اراسىنداعى شيەلەنىستىڭ ارتا تۇسەتىنىن بىلدىرەدى. سونداي-اق، اسكەري كۇشتەردىڭ سوڭعى بەلگىلەرىن دە ايعاقتاپ وتىر. بۇل تۋرالى "The Wall Street Journal" باسىلىمى جازعان ەدى.

يران مەملەكەتتىك تەلەارناسىنىڭ تاراتقان حابارىنا قاراعاندا، يران جاڭا بالليستيكالىق زىمىراندى ۇشىرعان. تەھراندا (تەگەران) بولىپ وتكەن يران-يراك سوعىسىن  ەسكە تۇسىرۋگە ارنالعان اسكەري پارادتا يراننىڭ وزگە دە جاڭا بالليستيكالىق زىمىراندارى، تانكتەر مەن سۋ استى سوعىس كەمەلەرى كورسەتىلدى.

پاراد باستالاردان بۇرىن رۋحاني ءسوز سويلەپ، سىرتقى ەلدەردىڭ نارازىلىقتارىنا قاراماستان يران ءوزىنىڭ قورعانىس قۋاتىن بارىنشا ارتتىراتىنىن، سەبەبى ەلدىڭ ءوزىن ءوزى قورعاۋى قابىلەتىنىڭ قاجەت ەكەنىن ايتتى. ول سوزىندە: «بۇل اتالعان قورعانىس قابىلەتى دەگەنىمىز ءبىر عانا بالليستيكالىق زىمىراندا عانا ەمەس، يران قارۋلى كۇشتەرىنىڭ سۋدا، قۇرلىقتا، اۋەدە بولسىن قورعانىس قابىلەتىن ارتتىرۋى بولىپ تابىلادى. يران ءوزىنىڭ حالقىن قورعاۋ ءۇشىن ەشكىمنەن رۇقسات سۇرامايدى»، – دەدى.

رۋحاني سوزىندە: «يران يەمەننىڭ، ءسۇريا جانە پالەستينانىڭ زۇلىمدىققا ۇشىراعان حالقىن قورعايدى. بۇل يراننىڭ ايماقتاعى تۋىنداعان قانداي دا ءبىر وقيعالارعا قاتىسۋىنان باس تارتپايتىنىن تۇسىندىرەدى. بۇل جانە اقش پەن ونىڭ وداقتاستارى اراسىنداعى يراننىڭ باستى قايشىلىقتارىنىڭ ءبىرى بولىپ كەلەدى»، - دەدى. اقش پەن يران باسشىلارىنىڭ  سوڭعى قادامدارى ەكى ەل اراسىندا تۋىنداعالى تۇرعان جاڭا قايشىلىقتار مەن شيەلەنىستەردىڭ ساقتىق دابىلىن قاعىپ وتىر. كەرەعار جاسالىپ جاتقان قادامدار ورتا-شىعىستا جاڭا قايشىلىقتى بارلىققا كەلتىرمەك.

“The Qazaq Times”