فوتو: Reuters

اقش ۇكىمەتى ازاماتتارىنا امەريكاعا كىرۋگە تىيىم سالىنعان ەلدەردىڭ قاتارىن سولتۇستىك كورەيا، ۆەنەسۋەلا جانە چاد مەملەكەتتەرىمەن تولىقتىردى. اق ءۇي بۇل شەشىمدى اتالعان مەملەكەت ۇكىمەتتەرىنىڭ مالىمدەمەلەرىنە قاراپ، قابىلداعانىن ءتۇسىندىردى. بۇل تۋرالى ۆۆس اقپاراتتىق اگەنتتىگى جازدى. 

دونالد ترامپ ءوزىنىڭ تۆيتتەر پاراقشاسىندا: "امەريكانىڭ قاۋىپسىزدىگىن قامتاماسىز ەتۋ - مەنىڭ ءنومىرى ءبىرىنشى قىزمەتىم. ءبىز ءوزىمىز سەنىم ارتا المايتىن ەلدىڭ ازاماتتارىن قابىلداي المايمىز", -دەپ جازدى.

وسى تۇستا ۆەنەسۋەلاعا قارسى قولدانىسقا ەنگىزىلگەن شەكتەۋلەر تەك بيلىك وكىلدەرى مەن ولاردىڭ وتباسىلارىنا قاتىستى ەكەنىن ەسكەرتىپ وتكەن ءجون. وسىعان دەيىن دونالد ترامپتىڭ قىتىعىنا تيگەن ەلدەردىڭ قاتارىندا يران، ءسۇريا، ليۆيا، يەمەن مەن سومالي بولعان. سوڭعى شەشىم بويىنشا وسى ەلدەردىڭ ءتىزىمىن تولىقتىرىپ تۇرعان سۋدانعا سالىنعان تىيىم الىنىپ تاستالدى. دونالد ترامپتىڭ التى بىردەي مۇسىلمان مەملەكەتىن قامتيتىن ءتىزىمى كوپ تالاسقا ءتۇسىپ، تالقى تۋدىرعان شەشىم بولدى ءارى "مۇسىلماندارعا سالىنعان تىيىم" دەگەن اتاۋ الدى.

امەريكا ءۇشىن "سەنىمسىز" دەپ تابىلعان ءۇش مەملەكەتتىڭ ازاماتتارىنىڭ اقش-قا ساپارىن شەكتەۋدىڭ نەگىزدەمەلەرى تومەندە بەرىلگەن:

سولتۇستىك كورەيا - امەريكامەن ەشقانداي ساياسي، ديپلوماتيالىق، ەكونوميكالىق بايلانىسى جوق مەملەكەت سانالادى. سوڭعى شيەلەنىسكەن قارىم-قاتىناستار مەن سوعىس قاۋپى تۋرالى بولجامدار كەزىندە، اقش-تىڭ كحدر-دى "ۇناتپاۋ" سەبەبىن ءتۇسىندىرۋ ارتىق شىعار.

چاد - تەرروريزمگە قارسى كۇرەستى قولدايتىن مەملەكەت بولعانىنا قاراماستان، اقش-تىڭ كۇدىك تۋدىرعان ازاماتتار مەن تەررورلىق اكت فاكتىلەرىنە قارسى پايدالى اقپاراتتار بەرۋ تۋرالى سۇرانىسىن قاناعاتتاندىرماي وتىر.

ۆەنەسۋەلا - بيلىك وكىلدەرىنىڭ ءساۋىر ايىنان باستاپ جالعاسىپ كەلە جاتقان كوتەرىلىستەر مەن دەموكراتياعا قارسى جاساعان ارەكەتتەرىن  اقش قولدامايتىنىن وسىلاي بىلدىرەدى.

“The Qazaq Times”