الماتى وبلىسىنداعى كوكسۋ قانت زاۋىتىنا اۆتوكەرۋەنمەن العاشقى قانت قىزىلشاسى اكەلىندى. قاپشاعاي قالاسىنىڭ شارۋالارى ءبىرىنشى بولىپ  50 توننادان استام قانت قىزىلشاسىن جەتكىزدى، دەپ حابارلايدى الماتى وبلىسى اكىمىنىڭ ءباسپاسوز قىزمەتى.

الماتى وبلىستىق اۋىل شارۋاشىلىعى باسقارماسىنىڭ باسشىسى سەكسەمباي بەكىشوۆتىڭ سوزىنشە،  سوڭعى ءۇش جىلدا قانت قىزىلشاسىنىڭ القابى ەداۋىر ۇلعايتىلعان. وتكەن جىلى الماتى وبلىسىنىڭ قىزىلشاشىلارى 6,4 مىڭ گەكتارعا ءتاتتى ءتۇبىر وسىرسە، بيىلعى جىلى بۇل داقىل القابىنىڭ كولەمى 9 مىڭ گەكتارعا جەتىپ وتىر.

قاپشاعايدان جەتكەن اۆتوكەرۋەنگە كەلەتىن بولساق، ول «ەسەن-امان» شارۋا قوجالىعىنان اكەلىنگەن. قوجالىق بيىلعى جىلى قىزىلشا وسىرۋمەن العاش رەت اينالىسىپ، 20 گەكتار جەرگە داقىل سەپكەن.

اتالمىش قوجالىق ىسكەرلىك قاتىناس ورناتقان «اگرو قانت» سەرۆيستىك-دايىنداۋ ورتالىعى» جشس كولىك تاسىمالى جاعىنان جاردەمدەسكەن. ونىڭ باسشىسى گۇلجاميلا بەكيەۆانىڭ ايتۋىنشا، قاپشاعايلىق قىزىلشاشىلار بيىل مول ءونىم جيناۋدى مەجەلەپ وتىر.

وبلىس اكىمدىگىنىڭ مالىمەتىنشە، بيىل قاپشاعاي قالاسىندا 570 گەكتارعا قانت قىزىلشاسى سەبىلگەن. گەكتارىنا 350-400 تسەنتنەردەن ءونىم جيناۋ جوسپارلانعانىمەن، بۇگىنگى كۇنى شاۋراشىلىقتار گەكتارىنا 600 تسەنتنەرگە دەيىن ءونىم الىپ وتىر ەكەن.

ايتا كەتەيىك، قازاقستان قانتى ۇلەسى از بولسا دا وزبەكستان، قىرعىزستان، اۋعانستان، رەسەي ەلدەرىنە ەكسپورتتالادى. الايدا وسى ايدا رەسەيدىڭ اۋىل شارۋاشىلىق مينيسترلىگى وتاندىق قانت وندىرىسىنە قولداۋ ءبىلدىرۋ ءۇشىن قازاقستان مەن بەلارۋس قانتىنىڭ يمپورتىن شەكتەۋدى ۇسىنعان ەدى.

“The Qazaq Times”