فوتو: railways.kz

قازاقستان رەسپۋبليكاسىنىڭ پرەزيدەنتى ن. نازارباەۆتىڭ تاشكەنتكە رەسمي ساپارى بارىسىندا 2-ءشى قازاقستان-وزبەك بيزنەس فورۋمى ءوتىپ، «قازاقستان تەمىر جولى» ۇك» اق مەن «ۋزبەكيستون تەمير يۋللاري» اق اراسىندا سترەتەگيالىق سەرىكتەستىك تۋرالى كەلىسىمگە» قول قويىلدى، دەپ حابارلايدى ۇلتتىق كومپانيانىڭ ءباسپاسوز قىزمەتى. 

«قتج» ۇك» اق باسشىسى قانات الپىسباەۆتىڭ ايتۋىنشا، كومپانيا ماشينا جاساۋ سالاسىنداعى الەمدىك - «General Electric»، «Alstom»، «Patentes Talgo S.L.»، «SIEMENS» سەكىلدى جەتەكشى كومپانيالارمەن سوڭعى ۇلگىدەگى جىلجىمالى قۇرامدى قۇراستىرۋدا وزىق يننوۆاتسيالىق تەحنولوگيالاردى قولدانۋدا.

قازىرگى تاڭدا قازاقستاندىق كاسىپورىندار جۇك جانە جولاۋشىلار تەپلوۆوزدارىن، ەلەكتروۆوزدارىن، جولاۋشىلار جانە جۇك ۆاگوندارىن شىعارادى. جولدىڭ ۇستىڭگى قاباتىنا قاجەتتى ماتەريالداردى وندىرەدى.

قازاقستاندىق كاسىپورىنداردان شىققان تەمىرجول كولىگى ماشينالارى ەكسپورتتىق سۇرانىسقا يە. ساراپتاۋلار قورىتىندىسىنا قاراعاندا، جالپى كولەمى 3 ملرد اقش دوللارى كولەمىندەگى ونىمدەردى 18 مەملەكەتكە وتكىزگەن. تەمىرجول كولىگى ماشينالارى ونىمدەرى كورشىلەس مەملەكەتتەر وزبەكستان، تۇركمەنستان، تاجىكستان، قىرعىزستان، ءازىربايجان، ۋكرايناعا ەكسپورتتالدى.

قازاقستان-وزبەك بيزنەس فورۋمى اياسىندا «قتج» ۇك» اق مەن «ۋتي» اق اراسىندا ستراتەگيالىق سەرىكتەستىك تۋرالى كەلىسىمگە قول قويىلدى ول كەلىسىم بويىنشا قتج بيىلعى جىل اياعىنا دەيىن وزبەكستانعا 5 مىڭ توننا رەلس ونىمدەرىن جەتكىزۋگە ۋاعدالاستى. بيزنەس فورۋم اياسىندا وزبەكستانعا جىلىنا 13,5 مىڭ توننا تەمىرجول ونىمدەرىن جەتكىزۋگە ۇزاقمەرزىمدىك كەلىسىمگە قول قويىلدى. 2020 جىلدارعا دەيىن وزبەك تەمىرجولىنا 40 مىڭ توننا رەلس ونىمدەرىن جەتكىزۋ جوسپارلانىپ وتىر.

2020 جىلدارعا دەيىنگى جالپى تەمىرجول ونىمدەرىنىڭ تاۋار اينالىمى اقش-تىڭ 320 ميلليون دوللارىنا باعالانىپ وتىر.

“The Qazaq Times”