سولتۇستىك كورەيا جاپونياعا قاراتا تاعى دا زىمىران اتتى

بۇگىن تاڭەرتەڭ سولتۇستىك كورەيا تاعى ءبىر مارتە زىمىران سىناعىن وتكىزىپ، ۇشىرعان زىمىرانى جاپونيانىڭ كەڭىستىگىنەن وتكەن.  وڭتۇستىك كورەيا مەن جاپون ۇكىمەتى وسىلاي حابارلادى. بۇل كحدر-نىڭ وسى ايدىڭ باس شەنىندەگى يادرولىق سىناعىنان كەيىن وتكىزىپ وتىرعان تاعى ءبىر ارانداتۋ ارەكەتى دەپ قارالدى. بۇل تۋرالى «The Wall Street Journal» باسىلىمى جازىپ وتىر.

جاپونيامەن حابار-بايلانىس دەپارتامەنتتەر مالىمدەۋىنشە، زىمىران سول ەلدىڭ جەرگىلىكتى ۋاقىتىمەن تاڭعى ساعات 7 شاماسىندا ۇشىرىلعان. 10 مينۋتتان كەيىن ەلدىڭ حوككايدو ارالىنان ۇشىپ ءوتىپ، تىنىق مۇحيتىنا قۇلاعان. زىمىراننان زارداپ شەككەندەر تۋرالى مالىمەت جوق.

بۇل سولتۇستىك كورەيانىڭ ءبىر ايعا جەتپەيتىن ۋاقىت ىشىندە ەكىنشى زىمىراندى جاپونيا كەڭىستىگىنەن ۇشىرۋى. الدىنعى زىمىران سىناعى 29 تامىز كۇنى بولعان. 3 قىركۇيەك كۇنى سولتۇستىك كورەيا ءوزىنىڭ التىنشى رەتكى يادرولىق جەراستى سىناعىن وتكىزدى.

جاپونيا ۇكىمەتىنىڭ وكىلدەرى مالىمدەمە جاساپ "سولتۇستىك كورەيانىڭ جالعاستى زىمىران سىناعىن جاساۋىنا توزە المايتىنىن، بۇل جولى ەڭ قاتاڭ ايىپتاۋ جاسايتىنىن" ايتتى.

وڭتۇستىك كورەيا ۇكىمەتى دە مالىمدەمە تاراتىپ، بۇل زىمىراندى ۇشىرۋ الاڭى سولتۇستىك كورەيانىڭ ورتالىق قالاسىنا جاقىن ماڭدا ورنالاستىرىلعانىن، الدىنعى رەتكى زىمىران سىناعى دا سول ورىندا جاسالعانىن حابارلادى. ولار ۇلتتىق قاۋىپسىزدىك كونفەرەنتسياسىن اشتى جانە كحدر ۇشىرۋ الاڭىن وقشاۋلاۋ ءۇشىن تەڭىزدەگى زىمىرانداردى ىسكە قوسۋ جاتتىعۋىن وتكىزدى.

وڭتۇستىك كورەيا جاقتىڭ بەرگەن مالىمەتىنە سۇيەنەر بولساق، كەزەكتى ۇشىرعان زىمىران 3700 شاقىرىمعا دەيىن ۇشقان. ماكسيمالدى بيىكتىگى – 770 كم. زىمىران حوككايدونىڭ وڭتۇستىك بولىگىنەن شىعىسقا قاراي 2 000 شاقىرىم جەردەگى تىنىق مۇحيتىنا تۇسكەن.

دۇيسەنبى كۇنى بۇۇ قاۋىپسىزدىك كەڭەسى يادرولىق سىناقتاردان كەيىن، كحدر-نىڭ التىنشى يادرولىق سىناقتارىنا جاۋاپ رەتىندە، سول ەلگە  قارسى جاڭا سانكتسيالار قابىلدادى. سولتۇستىك كورەيا سونداي-اق، سۋتەگى بومباسى كونتينەنتارالىق بالليستيكالىق زىمىران مۇمكىندىكتەرىمەن جابدىقتالعان دەپ مالىمدەدى.

“The Qazaq Times”