قالا كۇنى الماتى تۇرعىندارى مەن قوناقتارى ءداستۇرلى «الماFest-2017» الما فەستيۆالى، كوپمىڭدىق «Open Air «Gakku داۋسى»، «الماتى ارەناداعى» «ەما-2017»  مۋزىكا سىيلىعى باعدارلامالارىن تاماشالاي الادى. بۇل تۋرالى الماتى قالاسى اكىمدىگىنىڭ ءباسپاسوز قىزمەتى حابارلادى.

اكىمدىكتىڭ مالىمەتىنشە، 17 قىركۇيەككە دەيىن جۇرگىنشىگە باسىمدىق بەرەتىن پانفيلوۆ، جىبەك جولى، گوگول، قابانباي باتىر كوشەلەرىن قايتا جاساۋ جۇمىستارى اياقتالادى.

15 قىركۇيەكتە ساعات 10.00-دەن باستاپ قالا تۇرعىندارى مەن قوناقتارى الماتى مۇراجايىندا «الماتى پەتەربورلىق سۋرەتشىلەر كوزىمەن» اتتى كورمەنى تاماشالاپ،  پەتەربورلىق سۋرەتشىلەردىڭ تۋىندىلارىن كورە الادى. ءدال  سول كۇنى ساعات 18:00-دە جامبىل اتىنداعى قازاق مەملەكەتتىك فيلارمونياسىندا ي.موريلەند پەن گ. ۇزەنباەۆتىڭ فورتەپيانالىق دۋەت كەشى وتەدى، ال 19.30-دا م. لەرمونتوۆ اتىنداعى دراما تەاترىندا 85-ءشى مەرەيلى ماۋسىم باستالادى.

15 ، 16 قىركۇيەك كۇندەرى ساعات 19.00-دە اباي اتىنداعى ماتوب-تا كلاسسيكالىق ونەردى باعالايتىندار ءۇشىن الەمدىك بالەت كەشى كورەرمەندەرىن كۇتەدى.16 قىركۇيەكتە زاماناۋي وتاندىق مۋزىكا اۋەسقويلارى ءۇشىن قازاقستاندىق «Gakku داۋسى» فەستيۆالى وتەدى.

17 قىركۇيەكتە ساعات 10-00 دە قازاقستان رەسپۋبليكاسىنىڭ تۇڭعىش پرەزيدەنتى اتىنداعى ساياباقتا  جىل سايىن 200 مىڭعا دەيىن الماتى تۇرعىندارى مەن قوناقتارىن جينايتىن قالالىق ءداستۇرلى «الماFest-2017» الما  فەستيۆالى وتەدى. فەستيۆال ماڭىندا 100 توننادان استام المانىڭ ءدامىن تاتىپ، ساتىپ الۋعا بولادى، سونىمەن قاتار اشىق اسپان استىندا  ءتۇرلى سپورت، كوركەم، مۋزىكا الاڭدارى جۇمىس ىستەيدى، بۇلاردا شەبەرلىك سىنىپتارى، بالالار جانە وتباسىلىق ويىندار ۇيىمداستىرىلادى. كورمە اۋماعىندا قولونەرشىلەر كەلۋشىلەرگە وزدەرى جاساعان زەرگەرلىك بۇيىمدارىن ۇسىنادى، سونىمەن قاتار  وسى جەردەن قولونەر شەبەرلەرىنىڭ اكسەسسۋارلارىن، فۋرنيتۋرالارىن الۋعا بولادى.

ءدال وسى كۇنى «الماتى ارەنادا» ساعات 17:00-دە وتاندىق جانە شەتەلدىك ەسترادا جۇلدىزدارىنىڭ قاتىسۋىمەن «ەما-2017» ەۆرازيالىق  مۋزىكالىق سىيلىعى وتەدى.

قالا كۇنىنە وراي  الماتىنىڭ تاريحي ورتالىعىنىڭ ۇشتەن ءبىرىن جاڭارتۋ جۇمىستارىن اياقتاۋ جوسپارلانعان.

“The Qazaq Times”