فوتو: Getty Images

فيلليپيندەگى زاڭ شىعارۋشى ورگان رودريگو دۋتەرتەنىڭ ەسىرتكىگە قارسى سوعىس كامپانياسىندا تۇتقىندالعاندار مەن قولعا ءتۇسىرۋ كەزىندە سوتسىز اتىلعان ازاماتتاردىڭ ءىسىن زەرتتەۋمەن اينالىساتىن قوعامدىق قۇقىق قورعاۋ ۇيىمىنىڭ بيۋدجەتىن  1 مىڭ پەسوعا (20 $, 15 £) دەيىن قىسقارتۋ تۋرالى شەشىم قابىلدادى. بۇل تۋرالى ۆۆس اقپاراتتىق اگەنتتىگى جازدى. 

ادام قۇقىقتارى جونىندەگى كوميسسيانىڭ جۇمىسىنا بولىنەتىن قارجىنى شەكتەۋ تۋرالى ۇسىنىستى كونگرەسستەگى 119 ادام قولداپ، تەك 32 دەپۋتات قانا قوعامدىق ۇيىمنىڭ پايداسىنا داۋىس بەرگەن. كونگرەسستىڭ سپيكەرى پانتالەون الۆارەس قۇقىق قورعاۋ ۇيىمىنىڭ ەش پايداسى جوق دەپ تاپتى. ال اتالعان شەشىمگە قارسىلىق بىلدىرگەن توپ بۇل قادام ارقىلى مەملەكەت رودريگو دۋتەرتەنىڭ ەسىرتكىگە قارسى سوعىس ساياساتىن قاتاڭ سىناعان ۇيىمعا جازا بەلگىلەپ وتىرعانىنا سەنىمدى.

ەستەرىڭىزگە سالا كەتەيىك، ءفيليپپيننىڭ پرەزيدەنتى رودريگو دۋتەرتەنىڭ ەلدى ناشاقورلار مەن ەسىرتكى ساۋداسىمەن اينالىساتىن قىلمىسكەرلەردەن تولىق تازارتۋ ءۇشىن قولعا العان ساياساتىنىڭ شەڭبەرىندە مىڭداعان ازامات ءولتىرىلىپ، كۇدىكتى دەپ تانىلعان جەرگىلىكتى جانە شەتەلدىك ازاماتتار اباقتىعا جابىلدى. بۇل ساياسات الەمدىك قاۋىمداستىق تاراپىنان كوپ سىنعا ۇشىراعان بولاتىن.

ادام قۇقىقتارى جونىندەگى كوميسسيا 2018 جىلعا 1,72 ملرد پەسو (34 ملن $, 25 ملن £) سۇراعان بولاتىن. 2017 جىلى مەملەكەتتەن 749 ملن پەسو العان  ۇيىم 2018 جىلى ول قارجىنىڭ وننان ءبىر بولىگىنە دە قول جەتكىزە المايتىن بولدى.

جەرگىلىكتى تەلەارناعا بەرگەن سۇحباتىندا پانتالەون الۆارەس: "ەگەر ولار قىلمىسكەرلەردىڭ قۇقىقتارىن قورعاعىسى كەلسە، ۇيىمنىڭ بيۋدجەت شىعىندارىن دا سول قىلمىسكەرلەر وتەسىن!", - دەدى.

ەلدەگى تاۋەلسىز ۇيىمعا قارسى قولدانىلعان بۇل شارانى قولدامايتىندار ءالى سەناتتىڭ ماقۇلداۋىن تالاپ ەتەتىن زاڭ جوباسىنىڭ  ول جەردە دە پرەزيدەنتتىڭ ىقپالىمەن كوپ داۋىس جيناپ، قابىلدانىپ كەتەرىنەن كۇدىكتەنەدى.

“The Qazaq Times”