اقش-تىڭ بۇۇ-داعى وكىلى. فوتو: The Wall Street Journal.

دۇيسەنبى كۇنى بولىپ وتكەن بۇۇ قاۋىپسىزدىك كەڭەسىنىڭ ماجىلىسىندە، سولتۇستىك كورەيانى جان-جاقتى قىسپاققا الۋعا باعىتتالعان جاڭا سانكتسيا ءبىر اۋىزدان ماقۇلداندى. وسىعان دەيىن "قىتاي مەن رەسەي تارابى بۇعان قارسىلىق كورسەتەدى" دەگەنمەن، ولار دا جوبانى قولداپ داۋىس بەرگەن. بۇل تۋرالى تانىمال باسىلىم «The Wall Street Journal» ءوزىنىڭ رەسمي سايتىندا جازدى.

قۇراما شتات ءوزىنىڭ ەڭ العاشقى قاتاڭ جوباسىن ورتاعا سالمادى. ويتكەنى اقش سولتۇستىك كورەياعا قاراتقان باستاپقى جوباسىندا مۇناي تاسىمالىنا ەمبارگو قويۋ، سولتۇستىك كورەيا باسشىسىنىڭ شەتەلدەگى بارلىق اكتيۆتەرىن مۇزداتۋ تۋرالى جوبالاردى جاساعان ەدى. قۇراما شتاتتىڭ بۇۇ-داعى رەسمي وكىلى نيككي حەيلي: «جوبا قابىلدانعاننان كەيىن، سولتۇستىك كورەيانىڭ قولجەتىمدى جانارمايى 30 پايىزعا قىسقارادى. سونىمەن بىرگە، الەمدەگى بىردە ءبىر ەل يادرولىق قارۋعا يە سولتۇستىك كورەيانى قابىلدامايتىن بولادى. سانكتسيالاردىڭ بۇل جوباسى اتالعان ەلگە اۋىر سوققى بولادى»، – دەدى.

بەلگىلى بولعانداي، جاڭا سانكتسيالاردىڭ شەشىمى سولتۇستىك كورەيانىڭ توقىما ساۋداسىنا ەمبارگو تۋدىرادى. سونداي-اق، قاۋىپسىزدىك كەڭەسكە مۇشە ەلدەردەن سولتۇستىك كورەيانىڭ كەمەلەرىن ورتاق باقىلاۋعا الۋ تالاپ ەتىلەدى. بىراق، بۇل سولتۇستىك كورەيا كەمەلەرىنە اسكەري كۇش قولدانۋ دەگەندى بىلدىرمەيدى. جاڭا سانكتسيا جوباسىندا كحدر ەڭبەك كۇشتەرىنىڭ سىرتقا شىعۋىنا دا شەكتەۋلەر قويىلماق. سەبەبى، سىرتقا شىققان جۇمىسكەرلەرى سولتۇستىك كورەياعا جىلىنا 1 ملرد اقش دوللارى كولەمىندە تابىس اكەلەدى ەكەن. قاراردىڭ العاشقى نۇسقاسىنىڭ جوباسى باسقا ەلدەرگە سولتۇستىك كورەيالىق ەڭبەك كۇشتەرىن ەلىنە كىرگىزۋگە تىيىم سالۋدى ۇسىنعان. دەگەنمەن، سوڭعى جوبادا "ەگەر قاجەت بولعاندا باسقا ەلدەرگە سولتۇستىك كورەيالىق جۇمىسكەرلەردى كىرگىزۋگە بولادى" دەلىنگەن.

“The Qazaq Times”