ءسۇريا ەلىنىڭ پاسپورتى. فوتو: The Daily Caller.

گەرمانيا قاۋىپسىزدىك كۇشتەرىنىڭ مالىمەتىنە قاراعاندا، وزدەرىن «يسلام مەملەكەتى» دەپ اتاعان تەررورلىق ۇيىم 10 مىڭنىڭ ۇستىندەگى ءسۇريا ەلىنىڭ پاسپورتىن قولعا تۇسىرگەن. بۇل پاسپورتتاردى پايدالانىپ، اتالعان تەررورلىق توپتىڭ ادامدارى ەۋروپاعا كىرۋى مۇمكىن، دەپ توپشىلانىپ وتىر. بۇل تۋرالى «شينلاڭ» اقپاراتتىق اگەنتتىگىنىڭ رەسمي سايتى حابارلادى.

"Sunday picture newspaper" باسىلىمى 10 قىركۇيەك كۇنى گەرمانيا ىشكى ىستەر مينيسترلىگىنىڭ قۇپيا قۇجاتتارىنا سىلتەمە جاساي وتىرىپ، بارلىعى 11 مىڭ 100 تولتىرىلماعان پاسپورت قۇجاتتارى «يسلام مەملەكەتى» تەررورلىق توبىنىڭ قولىندا تۇرعانىن حابارلاعان. گەرمانيا ىشكى ىستەر مينيسترلىگى وسى اقپاراتتى سەنىمدى اقپارات كوزىنەن الىپ وتىرعانىن ايتقان. بۇل ۇرلانعان پاسپورتتار تۇگەلدەي ءسۇريا ۇكىمەتىنىڭ سەريالىق نومەرلەرى بار، الايدا ەشبىر ادامنىڭ اتىنا بەرىلمەگەن، اق كۇيدەگى پاسپورتتار ەكەنى انىق بولعان.

گەرمانيانىڭ تەرروريزمگە قارسى كۇرەس ۇيىمىنىڭ ساراپشىسى لاۋشەنستىڭ مالىمدەۋىنشە، بۇل پاسپورتتارعا تەرروريستتەر جالعان مالىمەتتەر تولتىرا الادى. سونداي-اق، تەررورلىق ۇيىمنىڭ مۇشەلەرىنە وزگە ەلدەردە لاڭكەستىك ارەكەتتەر جاساۋىنا تاپتىرمايتىن دۇنيە بولىپ تۇر. لاۋشەنستىڭ سوزىنە قاراعاندا، پاريجدەگى تەررورلىق شابۋىلدار دا وسىنداي پاسپورتتاردىڭ كومەگىندە جاسالعان.

قازىرگى ۋاقىتتا گەرمانيا فەدەرالدىق پوليتسياسى مەن ەۋروپالىق ەلدەردىڭ ءتيىستى ۆەدومستۆولارى وسى تولقۇجاتتاردىڭ سەريالىق ءنومىرى تۋرالى حاباردار بولعان. ەۋروپا ەلدەرى وسى ماسەلەنى قاداعالاۋدا سەلبەستىك ورناتقالى وتىرعانى ءمالىم بولدى.

"Sunday picture newspaper" باسىلىمىنىڭ حابارىنا قاراعاندا، وتكەن جىلى گەرمانيانىڭ يمميگراتسيا جانە بوسقىندار ءىسى جونىندەگى باسقارماسى 81 مىڭ 301 بوسقىننىڭ پاسپورتىن تەكسەرىستەن وتكىزگەن. سولاردىڭ اراسىندا 8 مىڭ 625 دانا پاسپورتتىڭ جالعان ەكەنى ءمالىم بولعان. دەگەنمەن ولاردىڭ اراسىندا اتالعان تەررورلىق توپتىڭ ادامدارى جوق ەكەنى دە راستالعان.

“The Qazaq Times”