نيكولاس مادۋرو وپپوزيتسيا باسشىسىن «حالىق جاۋى» دەپ ايىپتادى

نيكولاس مادۋرو وپپوزيتسيا باسشىسى حۋليو بورحەستى ەۋروپا مەملەكەتتەرىنىڭ باسشىلارىمەن كەزدەسكەن ارنايى ءىس-ساپارى ءۇشىن "حالىق جاۋى" دەپ ايىپتادى. بۇل تۋرالى APF اقپاراتتىق اگەنتتىگى جازدى.

نيكولاس مادۋرونىڭ حۋليو بورحەس  باسقارعان ۇلتتىق اسسامبلەيانى حالىقتىق قارسىلىقتارعا قاراماستان تاراتىپ، ورنىنا ءوز جاقتاستارىنان قۇرالعان جاڭا ورگان قۇرعاننان كەيىن، وسى اپتادا وپپوزيتسيا وكىلى فرانتسيا، يسپانيا، ۇلىبريتانيا، گەرمانيا باسشىلارىمەن كەزدەسۋ وتكىزگەن.

ۆەنەسۋەلا پرەزيدەنتى زاڭ شىعارۋشى ورگاننىڭ جيىنىندا سويلەگەن سوزىندە: "مەركەلدىڭ، بولماسا ۇلىبريتانيا پاتشايىمىنىڭ نە ايتاتىنى ماڭىزدى ەمەس، ۆەنەسۋەلانىڭ ءوز زاڭدارى بار. ءبىز لوندون، مادريد نە ۋاشينگتوننان بۇيرىقتار المايمىز!", - دەدى.

سولشىل تاراپ وكىلدەرىنىڭ ءبىرى: "حۋليو بورحەسكە وتانىنا ساتقىندىق جاساعان "حالىق جاۋى" دەگەن ايىپ تاعىلىپ، وپپوزيتسيونەر 30 جىلعا دەيىن اباقتىعا جابىلۋى مۇمكىن", -  دەپ حابارلادى.

4 تامىزدان باستاپ سايلانعان جاڭا زاڭ شىعارۋشى ورگان وپپوزيتسيا وكىلدەرىنە قارسى جاپپاي زاڭ اياسىنداعى جازالاۋ شارالارىن قولعا الىپ كەلەدى. اسسامبلەيا جانىنان "اقيقاتتى انىقتايتىن كوميسسيا" قۇرىلىپ، بيلىككە قارسى ارەكەت ەتكەندەردىڭ ىستەرىن قاراپ جاتىر.

نيكولاس مادۋرو حۋليو بورحەسكە "اقش پرەزيدەنتى دونالد ترامپپەن سىبايلاس" دەگەن كىنا ارتتى. اق ءۇي ۆەنەسۋەلا پرەزيدەنتىن "ديكتاتور" دەپ اتاپ, كاراكاسقا قارسى قاتاڭ سانكتسيالار ەنگىزگەن بولاتىن.

“The Qazaq Times”